SEDP board pawimawhna

Chief minister Zoramthanga chuan Assembly Budget Session neih mekah Mizoram sorkarin GAD hnuaia a din SEDP board 14-te chu an pawimawh takzet thu a sawi a; "Minister, secretary leh director chhuk thla ringawtin thil tih vek sen a ni lo," tiin project leh scheme base-a kal an tum avangin thiamna nei bik, pensioner leh department mite thawhhona a pawimawh thu a sawi. 

Congress Legis­lature Party leader Zodintluanga chuan sorkarin sum a harsat thu an sawilaia SEDP board lo din a, LDC pahnih leh fourth grade pahnih pek a, an office-a file pakhat mah kal si lo chu sum khawhralna a nih thu a sawi a; vice chairman-te pawh meeting lai baka hnathawh an neih loh thu a sawi ve thung. 

SEDP board hi sorkarin pawimawh leh ṭul a ti a, hnathawh tur a nei nia ngaiin a din a, an vice chairman-te phei chu protocol thil atan minister of state rank pek an ni. Sorkar lamin heti taka a ngaih pawimawh avang hian a hman ṭangkaina tur pawh a hre hle ang tih a chiang a, mi ṭhenkhatin 'sorkar hnathawkte ring zo loa anmahni chunga mi tur ruat belhna' an tih ang ngawt hi sorkar lam rilru a ni lo tih chu a chiang a ni. 

Sorkar lam ngaih­tuah danah chuan sorkarin hnathawh tur a ngah si a, thawktu indaih loh avang leh ṭangkai zawka hnathawh theih dan tur ngaih­tuahin heng SEDP board-te hi pawisa sen belh inhuamin an din a ni. SEDP board pawimawhna hi sorkar hruaitute hian an sawifiah ngun ta a, a chhan ber chu SEDP board din ṭul ti lo leh sawiseltu an tam vang a ni. Sorkar lam chuan chak zawk leh awmze nei zawka hnathawhna tura din a nih thu an sawi a, ram tana an ṭangkai leh ṭangkai loh chu an hnahthawh rahah mipuiin an teh thei dawn a ni.