Zirtirtu lak tura teh fung

Mizoram sorkarin muster roll-a zirtirtu 881 a lak turah tehfung atan thil chi li a hmang dawn, zirtirtu a hlawma lak a nih leh chuan written test neih ngei tawh tur an ti. Tun ṭuma zirtirtu lak turah hian personal interview-in mark 50 a pu a, intelligence quotient (IQ) test-in mark 20, locality (khaw mi nihna) in mark 10,  MTET neihin mark 10 a pu dawn a ni.

Zirtirtu lak a ni dawn a, dan awm sa ang chuan MTET nei chin chianin zirtirtu hi an dil thei tur a nihlaiin tunah chuan an tehfunga mark pu tlem ber chu MTET certificate neih a ni a, mark 10 chiah a pu. Tun ṭumah hian written test a awm dawn lo a, chuvangin interview aṭangin an la dawn a ni ber a, written test awm si loa ‘personal interview’ tih leh ‘IQ test’ han dah hrante pawh hi an mark pek dan tur hriatthiam a chakawm khawp mai.

Sorkar hian zirtirtu a lak tum danah hian dan awm sa apiang a ṭhiat a ni ber a, chumi hnuah pawh ‘interview chauh’ hman an tum laiin zirlai pawl lamin dodal an tum hnuah tehna hrang hrang an han siam leh rum rum a. Heng an tehna zamte hi zirtirtu ṭha lakna atana hman an tum dan hi hriatthiam a harsa em em a, a chhan chu a hma lawka an sawi lan miah loh zirlai pawlin an nawr hnua an sawi lan leh tak vang pawh a ni thei ang.

Written test neih loh turin ngaimawh a hlawh a, thuneitu lamin theih tawp chhuaha sawi mam an tum hnuah a sorkar berin zirlai pawl nena inremna an siamnaah, ‘Tun hnua zirtirtu a hlawma lak a nih chuan written test neih tawh tur a ni,’ ti lam zawngin thu an nei leh ang lawi a, tun ṭuma written test ṭul ti loa nakina zirtirtu lak a awm chuan written test neih an han tum leh lawi site hi hriatthiam a harsa hle a ni.

Tun ṭuma kan sorkarin zirtirtu 881 lak a tumnaa a tehfung hman hi chu hmun danga hman ṭhin nen a inang lo a, a sorkar ngei ngei pawhin hman zui tum tawh loin written test neih tawh an tum thute an sawi ang lawi a, kan zirtirtu lak dan tura tehfung hi chu a duangtute ngei pawhin kan duh khawp lo a ang mang e!