Grape aṭanga zir tur

Champhai Grape Grower Society (CGGS) chuan tun hnaiah Tlangsam Winery-a wine siamna turin Champhai leh a chhehvela grape chíngtute thar chhuah an leisak a; July thla chhunga an leisak tawh zat chu kg. 32,342.54 niin kg. khat Rs. 50-in an lei a ni. 

Mizoramah hian kuthnathawktute tana eizawnna nghet neih hi thil harsa tak a ni a, kan lo neih dan tlangpui hi kum khat atan a nih mai avangin innghahna tak tak a ni hleithei lo. Chutihlaiin hmun rem deuh bik leilet neih theihna hmunte a awm a, chu bakah sik leh sa, a awmna san leh hniam leh a hmunhmain a zir avanga thlai ṭhat duh bikna hmunte pawh a awm ve a - heng hmunahte hi chuan sum chang thlai nghelnghet deuha chin theih a ni. 

Champhai district-a khaw ṭhenkhatah hian grape hi a ṭha duh hle a, chhungkaw ṭhen­khat chuan eizawnna berah an hmang tawh a ni. Chutihlaiin chhan hrang hrang avangin an grape wine-te hralh a han harsa deuh a, a grape lawnga hralhna a awm ṭhat lohlai a awm bawk nen, grape chingtute hian harsatna lian tak an tawk hman. 

Tun hnaiah tluang takin grape hralh theih a ni leh ta hi a lawm­awm a, hetiang hian thlai dangte pawh hi a hlawma chinna hmunte awm thei se, sorkar leh pawl tan pawh ṭanpui leh buaipui a awlsam thei ngei ang. Tunah hi chuan khaw hrang hranga kan thlai chinte hi a la inang put put deuh vek a, a hlawm lian thama thil kan kalpui loh avangin eizawnna nghet atana hman a la harsa a, grape chingtute intel khawm thama an awm ang hian thlai leh thei dang chingtute pawh hi intel khawm tham law lawa awm theih hlan a nghahhlelhawm hle mai.