PAHOSS pawisa

Urban Development and Poverty Alleviation department hnuaia Aizawla lirthei dahna tur in sakna, Parking House Support Scheme (PAHOSS) kalpui mekah Mizoram sorkar chuan in sak ṭanpuina tur cheng nuai 6251 a pawm tawh a, cheng nuai 1003.30 a pe chhuak tawh. Ṭanpuina dawngtu tur mi 430 thlan a ni tawh a, lirthei dah theih zat tur hi LMV 4,764 leh two wheeler 8,994 - a zavaiin 13,758 a ni. 

Aizawl khawpui kawngpui tawtzia leh lirthei pun chak dan ngaihtuah hi chuan lirthei dahna tur hmun ruahman hi thil ṭul tak a ni a, sorkarin lirthei dahna tur hmun a ruahman hi thil ṭha tak a ni. Tuna sorkarna vawnfung chelhtute hian kum 2018 inthlan hma khan 'traffic jam awm lohna khawpui' siam an intiam a, chumi tur pawh chu a ni ngei ang, PAHOSS-ah hian sum an dah ṭhahnem tham hle a ni. 

Hetihlai hian ngun taka ngaih­tuah ngai chu Aizawl khaw­puia lirthei sing khat vel bawr dahna tur in sakna atana cheng nuai 6000 chuang pawisa dah hran a ni hi a ni a, Mizoram pumpui dinhmun nena bûk hian kan pawisa hman duhna lam hi chhût chian deuh a ṭha khawp mai. Lirthei dahna hi ruahman ngei a ṭhat rualin he pawisa hi UDPA department pawisa a nih ngai chuan, he department ken tel khawpuia mirethei (urban poor) tana chhawrna tur tel ve miah loa heti zat sen ral a ni tur hi ngaihtuah zui a ṭha khawp mai.

Heng pawisate hi UDPA department kuta mi a nih chuan thingtlang miretheite hnena va sem thu a awm lo a, chutih rualin state budget aṭanga siam rem a nih erawh chuan sorkarin a ngaih pawimawhna hmunah a hmang thei tihna a ni. Lirthei nei phak chinte hian tun hnaiah chuan lirthei an lei dawnah a dahna tur garage an neih thu sorkarah ziakin an thehlut vek a, chumi piah lama sorkarin a thlawn liau laua lirthei dahna a sa mai hi chu a pawisa ren loh thlak tia sawisel theihna kawng a awm ngei ang. 

Khawpuia mite puala pawisa lo kal a nih pawhin 'Urban Deve­lopment' tih piah lamah 'Poverty Alleviation' tih hi he depart­ment hian a keng tel a, retheite chawikanna lam hawiah pawisa hman tel ni thei se. PAHOSS-ah mah heti zat pawisa an dah thei a nih chuan, sorkar hian khawpuia mirethei zawkte a ngai pawimawh a nih chuan rethei chawikanna atan hian sum a dah ve thei tur a ni.