State Day ngaih pawimawh

Mizoram chief minister chuan sorkarin State Day-a chawlh a puang chunga a puala hun hman a awm ṭhin lo chu dik loa a hriat ṭhin thu a sawi a, "Kuminah State Day puala hun hman turin rawtna ka siam a, hun hman a ni ta a. India ram pawhin Independence Day leh Republic Day ropui takin a lawm ṭhin a, kan Independence Day leh Republic Day ni kawp hi ropui takin lawm a ni dawn lo'm ni? Kum dangah pawh ropui zawka lawm dan ngaihtuah a ngai," a ti. 

Mizoramin kan state puala ni pawimawh kan neih pahnih - Remna Ni leh State Day-te hi tlem lai deuh aṭang tawh khan politics nen kan chawm pawlh a, a ni a hlut tehlul nen kan zavaiin inthurualin kan lawm hleithei lo. Political party-a kan awmna azirin kan sawi mawiin kan sawi mawi lo a, kan sawi duh dan pawh a inang lo hle. 

Heti taka mahni state ni pawimawh ngaih pawimawh nachang hre lo emaw, ngai pawimawh duh lo lui kan ni ṭhin hi a vanduaithlak hle a ni. Tunah chief  minister-in kan state ni pawimawh ngai pawimawh tura rawtna a siam hi a lawmawm a, Mizorama chengte tan State Day hi a pawimawh a, lawm a phu a, sorkar pawhin he ni hi chawlh satliah ang maia hmang loin a puala hun bik neih hi inhmeh hle a ni. 

State Day hi kan la hmang leh zel dawn a, sorkarin he ni hi tun aiin ngai pawimawh se, mahni state ni pawimawh ngaih pawimawh nachang hre lo kan ni palh ang e.