Filling station endik

Siaha-a Legal Metrology enforcement staff-te chuan tun hnai khan Siaha district-a filling station awm chhun, J Rama Filling Station chu sawi lâwk loin an endik a; petrol leh diesel sem lai chu a ṭhat tâwk leh ṭhat tâwk loh te, pump-in a pek chhuah zat an teh dan chu a tling em, tih te an endik a; lei hnuai tanky-a oil-te pawh challan-a density inziak nen a inmil em tihte an enfiah bawk. 

Mizoram hi petrol leh diesel pawlh dal nasatna hmun niin an sawi ṭhin a, kan lirtheia oil kan thun ṭhinte hi state dangte nena khaikhinin a thianghlim loin a dal zawk hle niin a hre chiangte'n an sawi. Chutihlai chuan Mizorama oil phurh luhte hi thuneitu lamin an endik hian pawlh dal a ni tih an finfiah emaw, lirthei tana him lo tia an thawn let thawm hi hriat tur a awm meuh lo. 

Kan rama diesel leh petrol-te pawlh dal a ni tia kan sawi chunga a pawlh daltu man chhuah emaw, hrem an nih emaw hi hriat a ni ngai si lo a - khawi hmunah nge an pawlh dal a, tute nge pawlh dal ṭhin a, tu chin hi nge intiam rual, tihte hi sorkar thuneitu sang tan zawn chhuah a ṭha tawh khawp mai. 

Kan oil hralh chhuah dan a la mu­mal lo hle tih ti­chiangtu chu Aizawl khawpuia chhun en laia filling station kiang lawka dan loa diesel leh petrol zuar an inpho lang ngam hi a ni a, hengte thleng hian sorkar hian vil thei se a ṭha hle. 

Mizorama filling station-te hi tun aia zing zawka endik theih ni se, kan diesel leh petrol pawlh dal leh tihchingpen ṭhin hi a ziaawm thei deuh mahna.