Dan loa ran lak luh

Mizoram police-te chuan tun hnai khan Myanmar aṭanga dan loa Mizorama vawk lak luh 121 an man a, heng zinga parukin vawk pûl hri Procine Reproductive & Respiratory Synodrome (PRRS) an vei tih finfiah a ni tawh a, 121 zinga 20 thi tawhin, Selesiha AH & Vety department hmunah phûm a ni. 

Mizote hian vawksa hi ei nasa hle mah ila vawkah kan intodelh lo a, state pawn leh ram pawn aṭangin vawk talh tur hi lakluh a ni reng. Tun hnaiah PRRS a len avangin sorkarin thuchhuah siamin ram pawn aṭanga vawk lakluhte khap ṭhin mah se, a takah awmzia a nei meuh lo a ni ber. Vulh tur vawk note leh talh tur vawk puitling tawh hi a khat tawkin Myanmar aṭangin a lo la lut reng anga sawi ngam a ni. 

Tun hnaiah Police-te'n dan loa vawk lakluh an man a, hei hi an tih tur dik tak a ni. Heng an vawk man zingah hian PRRS vei an awm tih hmuh chhuah a ni lehzel hi a pawi hle mai a, hei hi Mizorama vawk vulhte tan a huatthlala em em a ni. Chumi piah lamah an vawk phurh luh ṭhenkhat hi kawng lakah a thi a, chu chu zawrh turin an rel niin a lang tel bawk a, hei phei hi chu vantlang pawisawina a tling hial awm e. 

Mizoramah dan loa ran lakluh hi engtiklai pawhin an kalpui hi a ni ber a, police gate hêl zawngin thiam takin an kal ṭhin niin an sawi. Tunah police-te'n an man ta a, a mawhphurtute chhui chhuaha dan anga hrem ngei ni se, dan loa ran lakluh tihtawp a nih theihna turin sorkarin ṭan la chhunzawm zel rawh se.