CM hmanga fiamthu thawh

Information & Public Relations minister chuan, tun hnaia party pakhat hruaitute thusawi chuan ram hmasawnna lam a kâwk lo hle nia sawiin, "Vision sawi tur pawh nei lo, vision pawh nei peih loin mipuite'n duh taka Chief Minister atana an dah hi fiamthu thawh nan hmang tawh lo turin thurâwn kan pe a ni," a ti. 

He minister thu­sawi hian social media lamahte sawi zui a hlawh hle a, a sawi ṭhain a sawi dik titu ṭhahnem tak an awm a, a thusawi demtu leh fiamthu thawhna atana hmang zui pawh ṭhahnem tak an awm. Heng thusawi kan dawnsawn dan hi political party rilru nen a nih tawh chuan a lai thei tawh ṭhin lo a, ṭan lam leh ṭan loh lam nei sa tan chuan eng thu mai pawh hi dawnsawn dan a danglam tawh ṭhin. 

Tun hnaiah mi ṭhenkhatin kan chief minister zahawm tak hi fiamthu thawhna hmanrua atan an hmang fo a, a thusawite sawi chhawngin a awihawm loh thute nasa takin an sawi fo a, uar taka thehdarh pawl an awm reng bawk. Politician thusawite hi chu 'a lehlam pawl' hi an awm sa hrim hrim avangin a tlak dan a rual tak tak thei lo a; nimahsela mahni ram hruaitute fiamthu thawhna hmanruaa hman fo loh hi thil ṭha ber a ni. 

Chutihlaiin mi fiamthu thawh tur va khap ngawt theih a ni lo a, mi tinin kan duh sawi theihna zalenna kan nei ṭheuh si a, mi fiamthu thawh dan tura ro va rel hi chu thil harsa tak a nih hmel. Chumi piah lamah fiamthua lak tura remchang tak han sawi chhuah khauh te leh, fiamthua sawi zui theih tura thu leh hla neihte pawh hi a awm ve thei tih hriat tel a ṭha awm e. 

Engpawhnise ram hruaitu chu mipuite thlan a ni a, kan duh taka kan thlan kan hruaitute hi kan party lam mi an nih loh vang maia deusawha nuihza siamna atana hman hi a puitlingzia lo hle a, ram hruaitute zahna lantir thiam hi kan zir zel a ṭha khawp mai.