Sorkar sum harsatna

Finance department enkawl­tu chief minister Zoramthanga'n kum 2021-22 atana Mizoram budget tur cheng vbc. 11,148.89 a pharh a; kum 2020-21 budget cheng vbc. 10,715 aiin vbc. 433.89-in a tam zawk a, a punna chu 4.05% a ni. Chief minister hian 2020-21 chhunga sum indaih lohna phuhrûkna tur Supplementary Demand for Grants cheng vbc. 3,058.08 a pharh nghal a; Covid-19 hripui avangin, "Sum leh pai enkawlna kawngah harsatna namén lo kan hmachhawn mek a ni," a ti. 

State hotupa berin budget a pharh rual a thusawi budget speech-ah Mizoram sum dinhmun a sawifiah a, chutah chuan, "Nikuma budget estimate kan pharh lai khan Mizoram pawhin hetiang sum leh paia tlakchhiatna hi kan tâwk ang tih rin lâwk ngaihna kan hre lo. Hetiang boruakin min nan tâk avang hian sum leh pai enkawlna kawngah harsatna naménlo kan hmachhawn mek a ni," a ti hial a, state sum enkawltu pa ber a nih avangin kan dinhmun a sawifiah hle awm e.

Tuma thiam loh ni bik lo, kan hriat lawk loh leh hmuh lawk loh hripuiin min nang thut a, khawvel dangte ang bawkin mizoram pawhin sum leh paiah harsatna namen lo a tawk. Hetihlai hian thil siam chhuah tih tham nei lo state kan ni a, sorkar hnathawkte hi kan sum che vel hnar ber an nih avangin kan state hian a lehlam zawng tak chuan Covid-19 hi kan tuar na vak lo tia sawi theih dan pawh a awm ang.

Hetiang kan sawi mek lai hian kan state sum leh pai dinhmun a ṭha lo hle tih chu kan Finance enkawltu pa ber thusawiah hian a chiang a, Covid-19 hripui len hma pawh khan kan state sum leh pai dinhmun hi chu a ṭha lo nasa tawh hle tih erawh phat rual a ni lo. Sum lakluhna lam swi tur kan nei mumal lo a, sorkar sum neih sa hmanna sorkar hnathawk hlawh leh sorkar inrelbawlnaah a kal tam si a, a tawpah state-in a tuar ta a ni ta ber mai. 

Kan chief minister thusawia, "Sum leh pai enkawlna kawngah harsatna namén lo kan hma­chhawn mek a ni," tih hian kan state sum leh pai dinhmun tichiang ber mai awm e.