Thlawhtheihna thlawh loh chhan

Chief minister Zoramthanga chuan Lengpui Airport runway a ṭhat tawh loh avangin, thlawh­theihna company-te Lengpuiah hian an service ṭhat duh loh phah thu a sawi a, “Ka hmuhchhuah thar chu thlawhtheihna runway khu a rei tawh lutuk a, resurfacing tih a nih ngai loh avangin thlawhtheihnate an thlawk ṭha duh lo," a ti. 

Tun hnaiah Mizo­rama thlawk ṭhin thlawhtheihna pakhat, private airlines Jet Air­ways chuan Mizorama an thlawh­theihna service an titawp a, Mizo mipuite’n harsatna lian tak an tawk mek. Jet Airways hian Mizorama an thlawhtheihna service hi an titawp a ni mai lo a, India hmar chhak hmun danga an thlawhtheihna service pawh an titawp tel bawk. 

Media report hrang hranga a lan danin Jet Airways hian leiba tam tak an nei a, hei vang hian an thlawhtheihna service hi India hmar chhakah chauh ni loin hmun dangah pawh an titawp nual a, an sum hman tihtlem tumin nasa takin an insiksawi mek a ni. 

Chief minister thusawi hi chu thil thar deuh, mipui nawlpuiin an la hriat ngai loh a nih hmel. Lengpuia thlawhtheihna tlan kawng a ṭhat tawk loh avangin thlawh­theihna an thlawk ṭha duh lo tih hi chu tun hnaia Jet Air­ways tawp chhan nen hi chuan thil inkaih­hnawih niin a lang lo. 

Engpawhnise tunah hian Mizoramah Air India chiah an thlawk a, chu pawh chu Kolkata aṭang chauhin a ni bawk a, khualzin, damlo leh official thila zin turten harsatna lian tak an tawk mek. Sorkar thuneihna pawn lam thil a nihna awm bawk mah se, kan sorkar hian mipui harsatna hriain thlawhtheihna tam zawk an awm theihna turin theihtawp han chhuah teh se.