Khauh taka zu do

Synod Executive Committee member-te nen an inkawmnaah Mizoram chief minister chuan zu khapna dan an siam tur chu a khauh dawn thu a sawi a, "Theihtawpin tihbo tumin hma kan la ang a, a khapna khauh taka kalpui kan tum a ni," a ti. CM chuan Rangvamual, Phun­chawng leh Airfield Venga chengte chu eizawnna ngelnghet an siam sak tur thu sawiin, "A aia hlawk zawk eizawnna kan siamsak chuan zu zuar peih an awm kan ring lo," a ti. 

Mizoramah sorkar­na a inthlak a, sorkar tharin a intiam ang ngeiin zu khap burna dan kenkawh leh a tum thu an tichiang ta. Chief minister berin zu khapna hi khauh taka an kalpui tur thu a sawi mai bakah, Aizawl chhehvela zu sakna hmunpuia chengte tan eizawnna hlawk tak, zu zawrh aia hlawk zawk an kalpui dawn avangin zu zuar duh an awm a rin tawh loh thu a sawi. 

Zu khap bur a nihlaia, 'A hlawhchham,' titu lamin an ṭan chhan ber chu awlsam taka zu lei tur a awm reng te, phai zin hawin airport aṭanga daptu awm miah loa an keng haw ṭhin te, milian chaw ei khawm nikhuain ualau taka zu chhawp tur a awm reng ṭhin thute leh, zu man tura beisei Excise department leh Police lamah ngei pawh zu in ṭhin tam tak an awm thute a ni. Hengte hi zu tihbo kan tum dawn a nih chuan sorkar hian a hma tel vek a ngai ang. 

Mipui nawlpui hian zu khap an duh lo a ni lo a, zu khap inti chunga awlsam taka zu lei tur a awm reng kha an sawisel ṭhin. Assam ramriah Mizorama lakluh tur liau liauin wine shop tam tak a ding a, khawpui lian deuh chhehvelah 'zu hmun' tih theih turin ualau takin zu a awm reng a, dana inziak lamah 'zu khap bur' a ni kha a inhmeh lo. Tunah sorkar thar a ding ta a, khauh taka zu do a tum hi a lawmawm a, theihtawp an chhuah dan mipuiin an thlir reng dawn a ni.