Sorkar hna latu tur

Mizoram Subordinate Ser­vices Selection Board (MSSSB) chairman atan Mizoram sorkar chuan MNF General head­quarters-a Adviser ni lai a ruat a; Mizo Students’ Union chuan, “Chairman atana party mi leh sa dah a ni hi ṭhalaite rilrua hlauhthawnna awm sa chawh thawhna leh Mizo zirlaite aiawha thu thlen zahlohna lian takah kan ngai,” an ti a, political party-a inhnamhnawihna nei lo mithiam dah an phût. 

Mizorama sorkar thar a din tirha a thil tih langsar pawl tak pakhat chu Mizoram Public Service Comission a tidanglam kha a ni. MPSC hna ṭhenkhat chhuhsakin, hna hniam lam latu tur MSSSB a din a, hei hi chak zawka hna an lak theihna tura tih a ni a, MPSC hna chhawk zangkhai thei tura ruahman a ni. 

Sorkar thar a din hnuah zirtirtu mi 800 chuang lak an nihin MSSSB a la ding lo a, MPSC kal tlang loa lak an ni. Hei bakah hian sorkar hna hrang hrang chu advertisement chhuah loa lak a ni bawk a, department ṭhenkhatah phei chuan mipui hnena puangzar miah loa a hlawma hna lakte pawh a awm. Hengte hi ruling party lam induhsak theihna remchang a ni a, thil ṭha lo tak a nih vangin hna lak a nih dawn hi chuan dan ang taka kalpui hi a ṭul hle. 

Dan ang taka hnalakna tura sorkarin a din MSSSB-a MNF Senior Adviser ruat thar zirlai pawl lamin an rawn dodal nghal chat hi thil mak a ni lo. A mimalin pa ṭha tak leh mi thiam tak, mi dik tak pawh a ni thei a; nimahsela a kalphung hi a fuh lo a, ruling party lama Senior Adviser zinga mipui nawlpui ban phak hnalakna a 

ṭhutchilh chuan ngaih a ṭha lo a ni. Hei mai hi a ni lo a, dan ang takin an thiam vang liau liauin tu emaw sorkar hnaah la ta se, MNF lam hnai an nih chuan thil dik lo awm miah loah pawh eptu lam tana sawi tur siamna remchang mai a ni palh thei. 

Kan ṭhalaite zinga a thiam fâl deuhin an beih ṭhin Group A chin hna chu MPSC-in an la dawn a, a nawlpuiin an ban phak hna latu tur chu MSSSB hi a ni. Hetihlaia MSSSB enkawltu tura ruling party-a nihna chelhlai ruat hi a in­hmeh lo a, zirlai pawl lamin an hre­thiam lo pawh hi thil âwm tak a ni.