Assam Rifles insawn tur hi

Ministry of Home Affairs (MHA) chuan February 19, 2019 khan office memorandum ti chhuakin, Aizawla Assam Rifles Battalion headquarters (Lammual leh a chhevel) chu May 31, 2019 hmaa Zokhawsanga insawn tura tih an nih thu a tarlang a; nimahsela Assam Rifles-te hi hun tiam chhungin an insawn hman ta lo. 

Assam Rifles-te hun tiam chhunga an insawn chhuak lo hi India rama thil thleng ngai lo a ni hauh lo a, dan pangngaiah chuan state sorkar tan thil zahthlak a ni lem lo ang. India ram hmun dangah pawh state sorkar hian sipai sawn chhuah hi an lo tum tawh ṭhin a, thil awlsam tak a ni lo. 

Tun ṭuma Assam Rifles insawn turin sawi a hlawh chhan erawh chu Mizoram sorkarin phur taka an chhuah tur thu an puan vang a ni. Hun tiamah chhuak ta se sorkar chak vanga chhuak anga sawi pawh an phur viau ang. Chutihlaiin sipai insawn chhuak tur hi state sorkar chaknaa tih vek theih a nih lohzia a takin a lang. 

Mizoram sorkar mai ni lo, Mizoram mipui pawhin Assam Rifles sawn chhuah hlan hi an nghakhlel a, sorkar laipui pawhin an chhuah thuai theihna turin ṭan la zel se a ṭha hle. Assam Rifles insawn chhuak tur hi politics thil nen sawi zawm ni tawh lo se, sipai insawn chhuak tur an ni mai a, chutihlaiin rang taka an chhuah theihna turin thuneitu lamin nawr zel se a ṭha khawp mai.