Traffic jam tihziaawm nan dan kenkawh

Aizawl khawpuiah chuan lirthei tawt lutuk vangin nun­phung a khaihlak hial. Tihziaawm dan tur rawtna pawh a tam ta hle. Kawngpui zau zawng leh lirthei awm zat ngaihtuahin, he har­satna hi chu thleng tur reng a ni. 

Sorkar parking policy thar, Parking House Support Scheme (PAHOSS) thawh khatna hi tihhlawhtlin ni ta se, lirthei 4500 vel hunna daih tura ngaih a ni a, chutih laiin kawngro su tham tura ngaih chu lirthei 18000 vel hun theihna niin chhut chhuah a ni. A tahtawlin he scheme hi tihlen ni se, kawngro a su deuh ang. 

Lirthei intlanchhawk dan zangkhai deuh, motor registration number behchhanin siam a ni. Mahse lirthei a pun phah a, rei lo teah harsatna ngaiah kan lut leh nghal. Number behchhan thoin a leta khauh dan siam a ni a, mipui harsatna a thlen zawk hlauhna vangin high court lama zualko an awm a, enchhin theih a la ni lo. 

Dan kengkawhtuten an thawh dan tur dik taka an thawh ni chu 'No tolerance Day' tih a ni a, dan bawhchhiaa lirthei khalh ṭhinte an bo duak a, traffic jam a awm loh phah. No tolerance puan loh ni zawng kha zalen taka dan bawhchhiatna atan a thianga ngaih a ni a, hei hi zir chian atan a ṭha. 

A duh duhin duh zat zat lirthei nei ngawt loin, lirthei neih theih zat hi khuah­khirh ni se. Khawpui dangte angin khawpui chhung kawngpuia motor hun hi chhun zan zawmin khap ni se. No tolerance day hranpa puang loin, eng hunah pawh dan bawhchhiate ngaihhnathiam loh ni se. Phuahchawp motor registration te, phuahchawp driving licence te hi a awm tak tak a nih chuan dap chhuah ni se, traffic jam vanga harsatna hi a ziaawm mai ang.