Sorkar, Kohhran, tlawmngai pawl leh zu

Excise Minister chuan tun hnaiah Hnam Runah thu sawiin, sorkar-in zu a khapna kawngah Kohhran, tlawmngai pawl leh khawtlang thawhpuina an ma­mawh dawn hle tih a sawi. 

May ni 28 aṭang khan Mizoram chu zu zawrh phallohna state a lo ni leh ta a, zu khapna dan Mizoram Liquor (Prohibition) Act, 2019 hman ṭan a ni ta. He danah hian zu khapna dan hmasaa 'total' tih tak kha a tel ta chiah lo a, hei vang hian a dan lamah thil danglam a awm nge awm lo tih chu mithiamten an la zir chiang thuai turah i ngai phawt ang. 

Sorkarin zu khapna dan a siam leh ta hi mipui duh dan mil niin a lang a, khawtlang leh kohhran duh dan tak pawh niin a lang. Hei vang hian zu khapna kawngah hian kohhran leh khawtlang pawhin sorkar hi ṭha takin thawhpuiin thlawp tlat se a inhmeh hle a ni. 

Hetihlai hian sorkar hotu ṭhen­khat thusawi duhthawh lutukin Pathian thuhriltu leh evangelist lamte karna leh phutna ang lek lek tlemlai deuha an sawi chhuak kha chu a inhmeh lo a, sorkar hruaituten an duhthawh luatah midang rilru an hliam palh thei tih an in hriat reng a ṭha ang. 

Kan ram tana ṭha lo, kan hnam tana him lo tiin zu chu khap a ni leh ta a, hei hi chak leh khauh taka kenkawh ni se a ṭha ang. Zu khap a nih hmasak hunlaia mi thiltithei deuhin an duhtawka zu an phur lut thei ṭhin te, officer rual inhmuh khawmnaa ualau taka zu in hmuh tur awm reng ṭhinte khan mipui mit a ti kham a; 'zu zawrhna khua' tiha sawi theih mai tur khawpa ualaua zu lei tur awm reng tho si te khan zu khap dan fuh lo a nihzia a tilang. 

Tunah chuan thil fel lo awm theite hre fiah sa vekin sorkarin zu a khap leh ta a, zu khapna hmasa anga zu man titotu leh a ruka zu zuarte hlawkna thlentu mai ni lo se, sorkar, kohhran leh tlawmngai pawlte ṭan rual a ngai e.