AMC thar a piang ta

Aizawl mayor thar leh MNF councillor thlan tharte chuan tun hnai khan Tuiriala bawlhhlawh paih na hmunpui, Solid Waste Management Centre an tlawh a, bawlhhlawh lâk khawm dan huam zau zawka kalpui a nih tur thu mayor chuan a sawi a, mipuite ṭawiawmna a ngen.

Aizawl Municipal Corporation inthlan dawna an sawi rin ber pakhat chu bawlhhlawh sawngbawl dan chungchang a ni a, politics-a inpuh tawnna a nasa hle. AMC hnathawh hrang hrang zinga a hlawm lian chu bawlhhlawh sawngbawl hi a ni a, an thawh danah fakna tur a awm ang bawkin sawiselna tur pawh a lo awm ngei a, chu chu inthlan dawnah an sawi chhuak ta hlawm a ni ber mai.

Mayor tharin inthlan dawna an thu inchuh zinga mi a hmuna kala a tlawh nghal chat hi thil lawmawm tak a ni a, bawlhhlawh lâk khawm leh sawngbawl danah hmasawnna kn hmuh ngei a beiseiawm. AMC inthlan dawna kha tih laia ruling lam insawifiahnate kha a tidiktuah an ṭan zui a ngai dawn a, eptu lamte sawiselna pawh huata la loa inen­fiahna atana hman zui a finthlak ang.

Inthlan dawna MNF intiamna hrang hrang kha Aizawl mipuiin an hre reng dâwn a, khangte kha tihlawhtling turin theihtawp chhuah se, an intiam anga hna an thawh chhung chu anmahni thlang tling duhtu Aizawl mipuite thlawpna an hlawh zel ang a, Mizoram sorkar pawhin 'ruling councillor' tana hnathawh a awlsam bîk dan an sawi kha an tihdik chhoh zui a ṭul bawk ang.