Journalist zalenna rahbehna

Mizoram chhim lama sipai chet velna a hmuna hre chiang a, report pe tura zin journalist-te chu Myanmar ramria Mizoram khaw ṭhenkhatah luh phalsak an ni lo. Hei bakah hian khaw tam takah lut leh chhuak tur sipaiin an endik a, khaw ṭhenkhatah chuan an khaw mi ni lo chu luh phal a ni lo. 

India rama state ralmuang bera inchhal kan nihlaia hetiang thil a thleng ta mai hi a mak a, hriatthiam a harsa hle a ni. Indona hmunah pawh ni se journalist-te chu an kal thei ṭhin a, silai rikna leh bomb puahna hmun aṭangtein report an pe ṭhin. 

Mizoram chhim lamah hian indo thawm hriat a ni lo a, police lam ṭawngkam aṭang chuan an tih ṭhin dan pangngai angin indo lemchan zir (joint training exercise) mai an ni. Chutiang lek ni siin khaw ṭhenkhata mipui lut leh chhuak tur an dang tlatte hi a mak a, thil hriatthiam theih loh chu journalist-te khuaa luh an phalsak lo hi a ni. 

Hemi kawngah hian Mizoram sorkar hian, ‘Kan hre ve lo reng reng, min hrilh ve lo,’ tih ringawt hi duhtawk lo se, mipui nun dan phung a khaihlak tawh a, kan journalist-te ngei pawh Mizoram chhunga khaw ṭhen­khatah luh an phal lo tawh a ni a, thil awm dan chiang zawk hi mipui hriatah puanzar ni rawh se. 

Tun hnaia chhim lama khaw ṭhenkhata journalist-te lut tur an dan chhan hi Mizoram sorkar hian a sawi thei lo a nih pawhin sipai hote hi an zawt fiah tur a ni. Kan ramah, state ralmuang ber nia kan inchhal chunga kan journalist-te an duhna khuaa an kal thei lo hi thil ‘serious’ tak a ni a, journalist-te zalenna rahbehna a ni.