Assam Rifles insawn chhuak tur hi

Ministry of Home Affairs (MHA) chuan February 19, 2019 khan office memorandum ti chhuakin, Aizawla Assam Rifles Battalion headquarters (Lammual leh a chhevel) chu May 31, 2019 hmaa Zokhawsanga insawn tura tih an nih thu a tarlang. 

Hun rei tak chhung chu Aizawl khawpui hmun laili aṭanga Zokhawsang lama Assam Rifles insawn chhuak tur hi buaipui a lo ni tawh a, tunah an chhuak dawn ta tak tak niin a lang a, a lawmawm hle. Hetihlai hian an chhuahsan tur ram hman dan turte leh kalpui dan turte thleng hian sawi lawk a lo awm tawh ṭhin a, ram inthleng tawn dan turte pawh ruahman sa a lo awm tawh bawk. 

Assam Rifles lamin MoU an duan ang chuan, Mizoram sorkarin AR hnenah August 21, 2006 khan kum 99 chhung atan Zokhawsangah ram acre 1305.15-a zau a pe a; Mizoram sorkarin Zokhawsangah AR-te'n an hmun tur an siam chhungin tui leh power supply a pe tur a ni. MoU ziah a nih hnuah Aizawla AR ram chu Revenue department kaihhruaina hnuaiah Mizoram sorkar leh Assam Rifle-in an endik ho ang. AR ram chhuansan chu official thil atan hman phal a ni dawn lo a, mipui tan chauha hman tur a ni. Mipui tan chauha ram hman a nih theihna atana dan siam chu Mizoram sorkar mawhphurhna a ni ang. 

AR lamin inremna tur an lo duan tawhte hi sorkar hian a kalpui zel dawn nge, inremna thar an siam dawn tih mipui hriatah puanzar a la ni lo a, inremna tura an duan hmasak ang chuan Lammual chhehvela hmun ṭhenkhat leh khawpui chhunga hmun ṭhenkhat hi chu AR lam hian chan zui zel an la tum dawn niin a lang. 

Engpawhnise Mizoram sorkarin ram zau tak a sahthlak sak tawh a, an chenna tur hmunah hian kawngpui ṭha tak siam a ni a, êng pek a nih ṭan tawh bakah tui pawh an pe thei tawh dawn bawk a, chenna in sak zawh thawkhat a ni tawh bawk. Assam Rifles hian Lammual chhehvela hmunte hi chhuahsan thuai se, chu chu mipui tana ṭangkaiah sorkarin hmang zui rawh se.