Road tax-ah duh thlan tur

Transport minister chuan, lirthei chhiah (vehicle road tax)-a lifetime tax (kum 15 chhung) lak ṭhin chu titawpin, road tax pe turte'n duh an thlan theih tur siam a ni dawn tih a sawi. Ruahmanna tharah hian kum 5, kum 10 leh kum 15-te thlan theih a ni ang. 

Tunah hian sor­karin lirthei chhiah hi kum 15 chhung atan a la a, lirthei hlui (used vehicle) leitu tan phei chuan kum 15 daih chhiah pek hi a na duh hle. Tin, lirthei ṭhenkhat hi chu kum 15 daih meuh lote a awm a, a leitu lam pawhin kum eng emaw chen an hman hnua tihral leh tura an leite pawh a awm. Hei vang hian lirthei registration tithar turin kum 15 atan chhiah (lifetime tax) an pe ṭhin hian sawisel a hlawh hle a ni. 

Mipui tana duhthlan tur awm theia an ruahman tur hi a lawmawm a, mipuiin an nghakhlel tawh ang. Kum 15 hi a rei lutuk piah lamah vawi khata chhiah chhun luh tur hi a tam tham a, lirthei neitute tan phurrit a tling phak a ni. 

Miin a lirthei atan chhiah a pek dan turah duhthlan tur a nei thei tur hi a lawmawm a, sorkar hian mipui tana awl­sam hi a zawng ṭhin tur a ni reng a ni. 

Transport minister hian lirthei chhiah lak dan tura ruahmanna thar a sawi chhuah hi mipui tan thil lawmawm a ni a, a rang thei ang berin kalpui rawh se.