HIV/AIDS do beihpui a la tawk lo

Mizoram hi HIV/AIDS do hna thawktu pawh nei ṭha ber pawl kan ni mai thei. Chuti chung chuan he natnain Mizo­ram a chim hneh dan leh pun dan rate la tlahniam hlei thei lo hi chu ngaihṭhatpui chi a ni hauh lo. 

HIV vei thar rate punna sang ber hnam nih hi kan sakhaw zui nen hian a inhmeh lo em em a, khawtlang nuna tlawmngai pawl chi hrang hrang kan neih ṭhat dan nen phei hi chuan a inhmeh lo lehzual; heti zawng hian Kohhran leh Tlawm­ngai pawl hruai­tute hian ngaih­tuahin mawh inphurh ngam se a ṭha ngawt ang. 

Nun sual kawng zawh tawhte enkawlna hmun (rehabilitation or counselling centre/ camp) ṭha tak tak tam tak kan nei a. HIV vei ngei, mahni mihringpuiten an vei ve ang tih hlauh vanga mualpho pawh pawisa lo, ṭhahnemngai taka langsar taka thawk, Positive Women Network of Mizoram ṭha tak kan nei bawk. Sorkar lam aṭang lahin he hnaa insawr bing, office hran nei MSACS kan nei bawk si. Heti chunga HIV darh dan rate sanna pawl ber kan la ni reng thei mai hi chu, hnam ang leh sakhua ang pawhin mual­phona nasa tak a ni. 

HIV laka la himte zirtirna kawngah te, vei tawhte enkawlna kawng­ah te, thawk­tute tana remchang siam kawngahte hian, thuneitu lam hian tih awm tak tih loh kan nei em aw? HIV darh dan rate a san zel lai hian, chumi enkawlna lama thuneihna leh mawhphurhna sang ber nei chu ministry aṭanga enkawltute hi an ni dawn lo’m ni? State sorkar hian lian tham deuhin beihpui thlak dan han ruahman se, Kohhran te, YMA leh MHIP te leh NGO-te nen 

ṭangrualin, he natna khuahkhirh dan kawng hi tih tak zeta ngaihtuah a ngai ta e.