Darkar 24 dawr theih
Aizawl hmun lunlai taka Mizofed filling station (petrol pump) chu darkar 24 chhung dawr theih tura hawn a ni. Pathianni bikah chhun dar 12 aṭanga dar 3 thleng hawn a ni ang a, a bak zawngah chuan darkar 24 chhung dawr theih an ni ang.
He ruahmanna hi mipuite tana awlsamna thlentu tur thil ṭha tak a ni a, hetiang ngaihtuahna sengtute hi an fakawm hle. Petrol pump-te phei chu chhun pachanga thui tak intlar remchang lote a ni a, lirthei veivak a tihbuai theih avangin zan lam lirthei tlem laia hawn a ni tur hi a lawmawm takzet a ni.
Hei hian Mizofed petrol pump bula dan loa oil zawrh pawh hi titawp nghal se a lawmawm ang a, langsar leh ualau taka black-a petrol leh diesel an zuar ngam hi a fuh lo hle. Mi ṭhenkhat chuan hetianga black-a zuartute hi petrol pump inkhar tawh hnuah mipuite tan an ṭangkai thu an sawi ṭhin a, tunah chuan petrol pump hi a inhawng nileng - zankhua tawh dawn bawk a, black-a oil zawrh pawh hi tihtawp ni thei se a duhawm hle.
Hei hian a ken tel tur thil dang a awm mai thei. Petrol pump a inhawng a nih chuan a bul vela nepnawi (ei tur) zuarte pawh rei tak an inhawng ve mai thei a, ngaimawh bik loh ni se a ṭha khawp ang. Tun hnaiah zan lama ei tur zuar hi Aizawl leh khawpui ṭhenkhatah an inhawng nasa ta hle a; nimahsela khawtlang hruaitute'n inhawn phal chin neiin a dar bi tukin an khar hmatir ṭhin.
Mipui tana awlsamna thlentute hi zan lama a dawrtute leh a chhehvela che tlate chet dan mawi lo avangin hun bik neiin khartir an ni fo a, a veng neitu lam thlirna aṭangin dik viau mah se eizawnna neitu tan erawh a pawi hle thung ang. Engpawhnise hetiang hunah hian sorkar chak, dan leh thupek kengkawh thei neih a ṭulzia a tilang chiang zual a ni.
Petrol pump leh dawr dangte pawh darkar 24 inhawng thei hi nei fur ila mipui tana awlsamna thlentu a ni zel dawn a, zan reiin a ken tel mi awm ṭha duh lote vai leh ven hi chu sorkar thuneitu lam kut a ni a, khawpuia cheng mipui nawlpui tana awlsamna thlen thei tura zan lama inhawng an tam deuh deuh hi a ṭhain a hun ve tawh hle a ni.