Sorkar hnathawk leh political party

ZONET Cable TV-in Mizoram Civil Services (Combined Competitive) Examination-a tling tharte chawimawina hun an buatsaiha thusawitu Mizoram chief secretary chuan, political party-a tel lo tur leh ṭan lam nei lo tura officer tharte a fuih rualin, sorkar lai apiang thawhpui thiam turin a chah. 

Mizorama sorkar hnathawk zingah political party ṭan lam nei leh tilang lutuk an awm ṭhin a, tun hnaiah a hluar emaw tih mai tur a ni. Sorkar hnathawk, sorkar aṭanga hlawh la si political party mi leh sa ang maia khawsa hmuh tur an awm fo a, hei hi a pawiin a zahthlak takzet a ni. 

Sorkarna vawnfung chelhtu party an inthlak rual apianga sawn loh theih loh khawpa party-a intulut thuk an awm ṭhin hi a vanduaithlak a, kan soakar officer liante thlengin he thilah hian an bang lo. Sorkar officer pawimawh zingah pawh political party âwn lam nei leh langsar khawpa party tana bei ṭhin an awm a, a pawi hle a ni. 

Chief secretary sawi ang hian sorkar hnathawk chuan sorkar apiang an thawhpui mai tur a ni a, party ṭan leh ṭan loh lam an neih ve chuan a buaithlak zo ṭhin. Sorkar chu a vawn fung chelhtu an inthlak ṭhin a, sorkar hnathawkte erawh chu an hna ngai an pension hmain an vuan mai tur a ni a, an rinawmna chu political party-ah ni loin an eizawnna an sorkar hnaah a ni tur a ni. 

Sorkar hnathawk ni si political party-a inhmang ang maia khawsa an awm ṭhin hi a pawi a, hei hi chu sorkar lai party pawh hian hrethiam ṭhin se a ṭha khawp mai. Miin sorkar hna a thawk duh a nih chuan politics-ah a inrawlhin a ṭan lam a tilang tur a ni lo a, a rinawmna chu a sorkar hnathawhah a ni tur a ni.