MPSC-in dan a thlah dul dawn em?

Mizoram sorkarin zirtirtu 946 lak a tumah, dan kalha thil tih a tum avangin zirtirtu lakna tura dan awm sa tidanglam turin sorkarin Mizoram Public Service Commission (MPSC)-ah ngenna an thlen niin Congress party thuchhuah chuan a tarlang a, sorkar chu dan awm sa ang taka zirtirtu la turin an phût. 

Congress thu­chhuah chuan, "Party mi leh duhsak zawng, zirtirtu atana thiamna nei lote zirtirtua lak an nih theihna tura dan awm sa khawih danglam an tum ngei niin kan hria a, hetianga hma an la hi a demawm tak zet a ni," an ti a, zitirtu lakna dan awm sa ṭhenkhat - 'Computer thiamna nei lak tur' tih leh 'Mizoram Teachers Eligibility Test (MTET) nei lak tur' tihte chu tidanglama ngaihhnathiam turin Mizoram sorkarin MPSC-ah a thlen a ni. 

Sorkarin a hnuaia hnathawktu a la dawn a, a sorkar berin hna la tura a din MPSC dan pangngai tihdanglam a dil hi a inhmeh lo hle. Tute'n emaw sorkar kaihhnawih thilah hnathawktu la dawn se, chutah chuan sorkar dan an tlin loh avangin tihdanglam dil ta se a la hriatthiam theih deuh a, a sorkar berin MPSC-a zirtirtu lak­na dan tihdanglam a dil hi chu a mak hle. 

Zirtirtu tur ṭha­lai mithiamin an daih lo a nih chuan hnathawktu lak dan tihdanglam tum hi a la pawm theih deuh ang a; nimahsela a dil theitu lamin an tlin em em chunga zirtirtu 946 lakna tura sorkarin MPSC-a dan tidanglam a dil hi pawm a nih chuan mipuiin he sorkar hna lak danah hian rinna an nghat zui lo ang tih hlauhawm tak a ni. MPSC dan tidanglam tura sorkarin a dilna chungchanga MPSC chhan dan tur hi Mizoram mipuite'n an lo nghak ṭhup dawn a ni.