Aizawlah kawng chhawng

Assembly Budget Session neih mekah chief minister Zoramthanga chuan Aizawlah kawng chhawng siam tura hmalakna kalpui mek a nih thu a sawi a, "Flyover pawh awm dawn mah se, a main trunk line-ah chuan elevated road tih vek kan tum," a ti a; Bawngkawna Brigade Field hnuaia kawng verh tlanga Chite lui hnara chhuaka Aizawl by-pass road pawh tura lei verh chu an rilrua an neih thu a sawi.

Chief minister hian kum 2018 inthlan hma khan traffic jam awm lohna Aizawl khawpui siam a tiam a, chumi thlen diktir tur chuan kawng chhawng siam a tum thu hi a lo sawi tawh a ni. Kan chief minister hian a tum hi a la thlak lo a, mi tam takin kawng chhawng siam hi thil harsaa an ngaihlaiin a tih theih dan zawngin ṭan a la chhunzawm zel a ni.

Tunah hian Aizawl khawpuia hmun lûnlai pahnih Vaivakawn leh Bawngkawnahte fly over siamna tur project chu sorkar laipui lamin an phalsak tawh ni a sawi a awm a, hei hi chu kawng chhawng nena sawi pawlh loh tur a ni. Chief minister ngei pawhin 'flyover' leh kawng chhawng hi a sawi hrang daih a, kan state hotupa beisei leh duh anga kan kawngpui pawimawhah hian kawng chhawng siam theih a nih hunah chuan traffic jam avanga Aizawl khawpui harsatna hi a ziaawm thei ngei ang.

Kawng chhawng mai ni loin lei verh pawh an rilruah a awm thu a sawi tel bawk a, lei verh theihna tura rem­changte pawh Assembly House-ah kan chief minister-in a sawi chhuak a; heng kawng chhawng leh lei verh chungchang a sawite hi a takin han tihlawhtling thei hlauh se Aizawl khawpuia traffic jam hi chu a chhawk ziaawm thei ngei ang.