Sorkar leh ruihhlo do

Excise & Narcotics depart­ment minister chuan zu khapna dan MLP Act chu a hming maia hmang an nih loh thu sawiin, "Ruihhlo do hi MNF sorkar top priority zinga mi a ni," a ti a, ruihhlo do kawngah kohhran leh tlawmngai pawlte puihna a ngen. 

Sorkar a inthlak a, zu khapna dan hman a ni leh ta a, titi a titam chho ṭan hle. Zu hi a in duhtu an tam avangin khap a nih chuan sawisel a hlawh dawn tih a chiang reng a, sorkar pawhin hengte huam hian zu hi a khap a, chumi kawngah chuan ṭan lak nasat a tum hle tih a lang a, thil lawmawm tak a ni. 

He mi rual hian ruihhlo dang pawh na taka do a ngai a, zu a van hian ruihhloah mi an tlan ṭhin nia sawi a ni a, hei vang hian ruihhlo do pawh hi tun aia na zawka kalpui a ṭul. Tun hma aṭang tawhin zu leh ruihhlo do kawngah hian hlawh neia sorkar mi chhawrte aiin hlawh nei loa tlawmngaia thawktute hi an thawh hlawk zawk emaw tih turin an awm ṭhin a; mi leh sa an ngah zawk avang leh tihtakzeta an beihna avangin tlawmngai pawlte hi zu leh ruihhlo man kawngah hian an thawh hlawk ṭhin niin a lang. 

Engpawhnise tunah chuan sorkar-in ke a pen tawh a, hnung lam a hawi thiang tawh lo a, theihna zawng zawng nena zu leh ruih­hlo a do a ngai. Excise minister pawhin ṭan lak an tum dan hi vawi tam media hmaah a sawi tawh a, mipui thlawpna pawh a hmu a, theihtawp han chhuah zel teh se. Zu khap chunga zu lei tur a awm rengna ram leh, kawtkaia awlsam taka ruihhlo lei mai theihna ram kan nih lohna turin sorkarin mawhphurhna sang tak a nei.