MNF leh BJP inkar thu

MNF president chuan tun hnaia a thusawinaah MNF-in BJP an ṭan ngai lo tih a sawi. Hei hi press conference-ah BJP Mizoram secretary chuan chhangin, BJP leh MNF chu National Democratic Alliance (NDA) ah an thawh dun thu a sawi a, MNF president Zoramthanga chu hmai phihna atana BJP zawm lo anga insawiah puhin MNF chu BJP nen an inkar thua dawt sawi kual reng loa an duh a nih chuan NDA chhuahsan law law mai turin an hriattir. 

NDA hnuaia awm ve ve ni si MNF leh BJP-te hi Mizoram inthlanpuiah khan a hranpain candidate an siam ve ve a, India ram inthlanpui kan neih zawh takah pawh a hranpain candidate an siam leh a ni. Inthlanah ber a hranga candidate an siam tawh chuan an thawk dunin an ṭang dun lo niin a ngaih theih a, MNF president-in BJP chungchanga a thusawite pawh hi thil awihawm lo a ni hran lo ang.

Thlirna lehlam aṭang erawh chuan pawl hrang pahnih mah ni se NDA bawm khata awm an ni a, NDA hnuaia awm party pahnih an ni a, an thawk dun tiin a sawi theih bawk ang. BJP secretary phei chuan BJP leh MNF inkar thuah MNF president chu vawi tam tak dawt sawi fo tawh angin a puh hial a, MNF chu Mizoram mipui hmaa BJP thawhpui lo anga insawifihlim tumah a puh a, MNF-in BJP an thlawpzia chu Mizoram mipuiin an hre chiang, ti hialin a sawi. 

Engpawhnise poli­tical party-te thu inchuh hi chu a dikna tak hriat fiah a harsa ṭhin a, a sawi hnu­hnung zawk apiang awih mai awlsam khawpin an sawi thiam ṭhin. MLA inthlan zawh hnu lawka Mizoram BJP president thusawi Press Trust of India (PTI) lamin an chhuah chhawnah chuan central lama BJP hotu liante'n MNF zawk an puih thu kha a sawi chhuak mauh a, Mizorama BJP-te pui loa MNF lam an pui daih a vuivaina thu ang deuh hi PTI lamin an chhuah tawh a ni. 

MNF leh BJP hi an thawk dun nge, an thawk dun lo mai ni loin an inhal zawk nge tih hi mipui nawlpui tan hriatthiam theih pawh a ni lo a, party pahnih hruaitute thusawi a inkalh miau avangin MNF leh BJP inkar thu hi chu inrinsiakah a la tawp rih mai dawn a ang hle.