Lengpui Airport leh Chief Minister

Chief minister Zoramthanga chuan tun hnai khan Lengpui Airport chei ṭhat mek a tlawh a, terminal building leh isolation siam ṭhat mek a enfiah a, thawktute chu hmalak zel dan tur a sawipui. 

Mizoram chief minister hian Leng­pui Air­port hi a vei hle tih a chiang a, amah ngeiin hnathawh lai hi endikin vawi tam tak a lo tlawh tawh a ni. Covid-19 hripui lenlai pawh khan Lengpui Airport-a runway resur­facing hna thawh te, Air Traffic Control siam ṭhat leh thlawhtheihna hûnna Apron zauh hna thawhte a endik a, Runway Safety End siam ṭhat turte pawh a lo en tawh a; lockdown chhunga a tam thei ang ber hna thawk hman turin a lo hrilh tawh a ni.

Kan chief minister anga mahni state airport veia a hmuna tlawh peih hi an awm kher lo ang a, hei vang hian kan state hian airport ṭha tak kan nei ngeiin a rinawm. Eptu lamte phei chuan hripui lenlaia ramri ven hnathawktute pawh tlawh loa airport a tlawh tlut tlut avanga an dem thute an lo au chhuahpui hial tawh a ni.

State dangte nena kan inkal pawhna pawimawh tak mai, kan airport neih chhun chei ṭhat hna heti taka veitu chief minister kan neih avang hian kan airport pawhin a changtlun phah ngei a rinawm a, hnathawh kal mek hi a khat tawka amah ngeiin a endik fo avangin chak tak leh tluang takin airport siam hna hi kal se, airport lian leh ṭha ber kan nei thei lo a nih pawhin airport zahpuiawm lo tak kan neih phah ngei a beiseiawm.