Sorkar leiba

ZPM MLA Dr Vanlalthlana chuan, Mizoram chief minister chu MNF sorkar hmasaah Finance department enkawltu a ni tawh a, a sulhnu aṭangin sorkar sum enkawl thiam tak a ni lo tih a chian tawh thu a sawi. "Tunah Finance a enkawl leh a, sum hmanna turte ngaihtuahin, leiba rulh hleih theih lohna thang (debt trap)-ah kan lut mai ang tih a hlauhawm hle a ni," a ti, MNF sorkar laiin Mizoramin leiba a ngah thu a sawi chhuak. 

Mizoramah sorkar thar a piang a, mipuiin beiseina sang tak nen an thlir. He sorkar thar hian hnathawh a tum hle tih a lang a, hnathawktu tur awm sate duhtawk mai loin committee thuneihna sang tak neite a din belh nual a, minister ni ta lo MNF MLA-te chu heng committee hrang hrangah hian nihna pawimawh neiin an awm deuh vek a ni. Hei hi sorkarin hnathawh a tumzia tichiangtu tiin a sawi theih ang.

Hnathawk tur chuan a thawktu mihring mamawh a ni a, chu chu he sorkar hian a la khawmin a rem khawm tawh niin a lang a, an hnathawhna tur sum leh pai a mamawh tel bawk. State dangte ang lo takin he state hian thawh chhuah a nei mumal lo a, kan inenkawlna tura sum leh pai hi sorkar laipui aṭanga lo kal a ni deuh fur a, kan pawisa neihte ṭangkai leh thiam taka hmanzai hi a pawimawh hle a ni. 

He sorkar hian fing taka ro a rel a, eiruk leh hlemhletna laka a inthiar fihlim a, mipui hma ngai taka an thawk tak tak a nih chuan kan pawisa neih ang ang pawh hi leiba inchhek khawm ruih loa hman ṭangkai tham niin a lang. Chutiang ni loa a nawrtu apiang tihlawm tuma thil an tiam zel a, kan sum neih zat ngaihtuah loa a hmanna tur an rel belh zel chuan, ZPM MLA sawi ang hian tal chhuah theih tawh lohna leiba thuk takah kan tla lut palh thei - MNF hian an rorel hmasak tawh dan aṭanga inzirin, Mizoram hi state hausaah a siam thei lo a nih pawhin, leiba ngah state ni loah tal chhuah thei se a duhawm ngawt mai.