Rua

Green Mizoram Day-a a thusawinaah Mizoram chief minister chuan, economy-a Mizoramin hma a hruai theihna atan ruá hman tum a nih thu a sawi a, "Rua hi eizawnna atana ṭha ber, hahdam ber, ruahtui vawnhimna atana ṭha leh boruak tihthianghlimna atana ṭha ber a ni. Enkawl a ngai lo a, a puitlin tawh chuan a seng hun nghah a ni mai," a ti a, rua hmangin buh ṭin nga hmunah cheng nuai 50-70 thar theih a nih thu a sawi. 

Mizoramin chief minister thar a nei a, ani hian a thusawinaah vawi tam tak mau leh rua hmanga Mizoramin sum a hai luh theih thu hi a sawi tawh. A tuina tak a nih piah lamah a lo zir chiang nasa tawh a, rua hman ṭangkai a nih theih dan hi a sawi uar hle a, hei hi Mizoram mipui tan a thlamuanthlak hle a ni. 

Mizoram hi mau leh rua a ṭhat duhna hmun a ni a, kan thil thawn chhuah tlem te zingah mau hi a tel a ni. Kan chief minister sawi rua hi chu kan raw neih sate aia ṭha zawk leh lian thei zawk a ni dawn a, he rua hi ṭin nga hmunah ringawt pawh cheng nuai 50-70 te lei theih a nih thu chief minister ngeiin a sawi a, hlawhtling taka chin a nih chuan he rama retheihna hi um bo a ni tawh dawn niin a lang. 

Hei mai hi a ni lo a, India hmar chhaka helna umbo tur pawhin rua hi a ṭha tawk niin chief minister hian a sawi bawk a, "Miin maktaduai tél la lut se, tumah an rammu peih lo ang," a ti a, a thlirna aṭang chuan a dik thei hle ang. 

Chief minister meuhin a atchilh nia a lan avang hian rua hi kan ramin sum leh pai ṭhahnem tak a lakluhna tur hmanrua ni ngei dawnin a lang a, thingtlang kuthnathawktu kum rei tak lo bet tawh tan pawh rua hi din chhuah theihna ngei tur a nih hmel. Ṭin nga hmuna cheng nuai 50 chuang hmuh theihna tur rua hi Mizoramah hian tihtakzetin kalpui ila; chief minsiter sawi hi a dik a nih chuan rua hi kuthnathawktute chawi kanna atan mai ni lo, state sum leh pai dinhmun chawi kanna atan pawh a ṭhat hle a rinawm.