MPSC hmalam hun

Council of Ministers ṭhu­khawm chuan, Mizoram Public Service Commission (MPSC)-in sorkara thawk tur lakna a khawih ṭhin zinga group B (non-gazetted) chin chu MPSC hnen aṭanga laksak a rel. Group-B (non-gazetted) chin hnuai lam hna thawk tur lakna buaipui turin Mizoram Subordinate Services Selection Board (MSSSB) din an rél a ni. 

Sorkar thutlukna hi eptu pawl pahnih - Congress party leh ZPM ṭhalaite chuan thuchhuah siamin an duh loh thu an puang a, MNF kaihhruai sorkar chet dan chu mahni party mi leh sate invulhna tur a nih an hlauhthawn thu an tarlang. 

Sorkarin MPSC aṭanga sorkar hna an lak ṭhin an chhuhsak chhan nia lang chu MPSC indaih loh vang a ni. 'MPSC hi hnathawktu lak danah an dik tawk lo a, induhsakna an neih avangin thawktu atan a tling lo zawk an tlintir ṭhin,' tih vang pawh ni lo a, an indaih loh vanga an hnathawh ṭhin lak ṭhensak hian ngaihtuahna a tithui hle a ni. 

Sorkar laipuiah chuan UPSC a awm a, chumi ni lo Staff Selection Commission (SSC)-te pawh an awm. Ram pum huapah chuan hna lak a hautak thamin mihring an ṭhahnem tham a, chuvangin UPSC leh SSC a awm hrang pawh hi a âwm hle. Mizoramah chuan a hna zawng leh exam ṭhin chu sawi loh a mi cheng hrim hrim pawh mi nuai 11 vel lek kan ni; chutihlaia sorkara hna zawng ṭhin chu buaipui harsa khawpa tam an la nih hmel lo. 

Mipui nawlpuiin an hlauh­thawn chu tun hma pawhin MPSC hna lak tur tihdanglam duhna a lo awm tawh ṭhin a, sorkar leh MPSC inhrui pawh hi sawi tur a lo awm tawh. Tuna MPSC kalphungah hian an dik lohna leh hna laka an fel lohna sawi si lo a, 'an indaih lo' tih vanga sum tam tak sen belha MSSSB din tum hi chu sorkar hian ngaihtuah ṭha leh se a ṭha khawp mai. 

MPSC 'indaih lohna' hi pui turin staff lak belhin MPSC hi tilian ta mai se, a hran a hraia sum tam tak sen belha MPSC thuneihna pawna MSSCB din tur hian hna zawng mekte ngaih a tiṭha lo takzet a ni. "Kan sorkar tawh a, kan duh duh kan ti thei," ti niawm taka sorkar hna lakna bitum chat chat ang maia kan sorkarin ke a pen hi chu thutlukna fing ber a nih a rinawm lo a, MPSC hmalam hun hi kan ram hmalam hun nen thui tak a inkungkaih ngeiin a rinawm.