Budget - a chi tur

Finance changtu chief minister Zoramthanga chuan tun hnai khan kum 2019-10 chhunga Mizoram budget tura ruahman cheng vbc. 10,692.30 a pharh a, hei hi kum 2018-19 Mizoram budget aiin vbc. 1,019.66-in a tam zawk. Sorkar flagship programme SEDP atan cheng vbc. 750 dah a ni. 

Mizoram budget tura ruahman cheng vbc. 10,692.30-a Mizoramin a tum ve tur chu cheng vbc. 1,072.01 a ni a, chu chu 10.02% niin a bâk zawng 82.5% chu sorkar laipui aṭanga sum hmuh tur leh loan pûk tur a ni. Hmasawnna hna thawhna tur (capital expenditure) atan cheng vbc. 2,288.78 ruahman a ni a, hei hi 2018-19 revised estimate aiin cheng vbc. 254.9-in a tlem. Sorkar hnathawk hlawh, pension hlawh leh department inenkawlna senso tur (Revenue Expenditure) atan cheng vbc. 8,403.52 ruahman a ni a, chu chu budget pumpui aṭangin 78.59% a ni. 

Hun rei tak chhung chu Mizoram budget hi mipui nawlpuiin kan ngaihven ngai meuh lo a, tun hnaiah erawh ngaihven a hlawh ve ta hle. Hei hian sorkar kal tum dan thui tak a hril a, sorkarin a kalpui tur duhzawngte leh a ngaih pawimawhte pawh a pho lang ṭhin. Tuna sorkar kum thara budget tur pharh hi mipuiin ngun takin chik ila, sorkar hawi lam tur leh kum tawpa a awm dan tur pawh thui tak chu a thlir lawk theih a ni. 

Tun budget aṭanga a lan danin kum 2019-20 chhung hian Mizoram chuan leibá cheng vbc. 455.58 a neih belh dawn niin a chhut theih a, chuti a nih chuan tun sorkar kum tawp (March 2020)-a Mizoramin leibá a neih zat tura chhût chu cheng vbc. 8,447.92 a tling. Hei hi ngaimawh tham a nih leh nih loh chu hunin a la hril ang a, engpawhnise kan state intodelh lohzia chu kan budget hawiher aṭangin a lang chiang chho zel a ni. 

Mizoram enkawlna tura kan pawisa neih (budget) atanga cheng vbc. 8,403.52 zet mai chu sorkar hnathawkte hlawh leh office inenkawlna senso atan a kal dawn a, hei hi budget pumpui aṭangin 78.59% zet a ni. Mipui nawlpui, sorkar hnathawk ve phak lote chan tur lam hi a tam lo hle a, sorkar hotu lamin ṭan an lak hle a ngai dawn a ni. 

Hetihlai hian kan chief minister leh Finance department enkawltu berin, "Budget hi chu a chi tur chauh a ni," tiin a sawi fo ṭhin a, a chi a nih chuan hei aia tam zawk hi hmun dang aṭangin lakluh belhna a la hria a nih hmel a, chuvangin mipuite'n sorkarah rinna nghat chungin kan budget piah lamah hian sum ṭhahnem tak sorkar thuneitute'n lakluh belh an tum tih i hre reng ang u.