Chakma chhiarpui

Central Young Lai Association (CYLA)-in Lawngtlai district chhunga Chakma foreigner dap chhuak tura chhiarpui an buatsaih chu duh loin Young Chakma Association (YCA) chuan lawngtlai DC-ah an hêk. Hetihlai hian Central YMA leh MZP chuan CYLA-in Lawngtlai district hmalakna chu an thlawp tlat thu an sawi a, Chakma chhiarpui chu kal tlangpui ngei an duh thu an chhuah. 

Tun hnaia sawi hlawh tak mai chu Chakma-te chung­chang hi a ni. Chakma-te hi Mizoram mi leh sa dik tak ni loa ram pawn aṭanga pêm lut an ni a, chutih rualin 1950 hma lama Mizorama pem lutte leh an thlahte chu India khua leh tui dik tak anga pawm an ni. Tuna Mizoram tibuaitu lian tak chu Chakma pung chak ta lutuk leh political party ṭhenkhatin 'vote bank' anga an hmanga an duhtawka an inluling zui ta zel hi a ni. 

Chakma-te hian anmahni pualin Autonomous District Council an nei a, hei hi Mizo mipui nawlpuiin hnawk an tih tehlul nen political party hruaitu ṭhenkhat chuan vote zawnlaiin Chakma-te ADC pe theitu nih chu an tlangaupui deuh titih hial ṭhin a, a vanduaithlak hle. ADC an neih piah lamah kan state-in zirna sang ṭhenkhata quota an neih chu ram leilung fa angin an rawn chuhpui chho mek tawh a, he buaina hi tawp mai loin a zual zel dawn a nih hmel. 

Chakmate pun chak danin kan ngaih a tiṭha lo tlang a, CYLA chuan Chakma foreigner-te dap chhuah an nih theihna turin Lawngtlai district chhunga Chakma chhiar­pui kalpui an tum a, chu chu Chakma pawl (YCA) in duh loin thuneitute hnenah an hêk ta a ni. Chakma zingah foreigner ni lo tan he chhiarpui neih hi thil hnawksak a ni dawn lo a, mihring zat chhiarna tur a ni mai. Chutihlaia an pawl lian berin an duh lo hian Chakma foreigner an tamzia a tilang kan ti thei awm e. 

Engpawhnise CYLA hian an thil tih tum hi chhunzawm se, CYMA leh MZP lam pawhin thuchhuah hmang an thlawpna hi a taka lantirin chhiarpuiah hian va hnatlanpui thei bawk se. Chakma-te hnuaichhiahna leh diriamna lam a ni lo a,  dan anga awm leh dan loa lut rute thliarhranna tura ruahmanna ṭha tak a nih vangin Chakma foreigner dap chhuak tura chhiarpui neih hi kaltlangpui ngei ni se a ṭha khawp ang.