Chini

Food, Civil Supplies & Con­sumer Affairs (FCSCA) minis­ter chuan tun hnai khan Zuang­tuia FCSCA kudam aṭangin miretheite hnena man tláwm zawka chini sem tur motor pahnih chu a vai liam. Chini hi mi harsa zawk Antyodaya Anna Yojana (AAY)-te tan thla khatah chhungkaw pakhatin kilogram khat zel man tlawmin an dawng thei dawn a ni. 

Mizoramah sorkar thar a piang a, anni hian an intiam angin chini sem ṭhin tawp ta chu an sem thar leh dawn a, a lawmawm hle. Tuna an chini sem tur hi mipui zawng zawng huap a ni lova, mirethei zawkte hnena sem tur a ni a, a thlawna sem tur ni loin a leia lei tur a ni a, man tlawm zawka lei tur a ni. 

Tuna chini sem chin hi chu eng tham a la ni mang lo a, minister sawi ang hian tam zawk sem dan an ngaihtuah zel dawn a, a lawmawm hle a ni. Chhungkua zawng zawng pawh ni lo, chhungkaw harsa bikte hi chu sorkar hian a thlawnin sem thei se a duhawm a, sorkar sumin a la daih lo deuh a nih pawhin a tihdan ngaihtuah thei se AAY chhungkaw tan a lawmawm khawp ang. 

Kan ram hruaituten motor pahniha chini sem tur an phur chhuak an han vai liam hluai mai hian kan ram dinhmun a hril chiang hlein a ngaih theih a; hetiang thil pawh minister vai liam tham khawpa lian leh hmingṭhatna (acheivement) tling a nih tawh chuan kan ram hian hmasawnna tur a la mamawh hle tih a chiang a ni. 

Mirethei zawkte tana thla khata chini Kg khat zel lâk tur a awm tur hi a lawm­awm a, hei hi AAY chhungkuate hian a leia an la lei dawn avangin sem lam ai mahin man tlawm zawka an lei dan tur siamsak a ni ber. Hetianga AAY-te’n man tlawm zawka chini lei tur an nei lo hman kha a vanduaithlak a, FCSCA minister-in chini tam zawk ngaihtuah tur a nih thu a sawi hi a tak chantir ngei se a lawmawm khawp ang.