Tui harsatna leh Aizawl

Aizawl khawpui tui lâkna tura mamawh kawlphetha hmuh ṭhat loh avangin tui pump tam thei a ni lo a; PHE department chuan, tuia harsatnaah mipui hriatthiamna an ngen rualin, tui ren turin an ngen nghal.

Aizawl khawpuia mipui ṭhahnem tak chawm turin kan tui pump-na neih hian a chawm zo lo a ni ber a, harsatna eng emaw hlek a thlenin a khaw pumin kan buai nghal chu a ni ber mai. Hei hi mipui pawhin an hrethiam tlâng niin a lang a, kan hmanraw neih leh a hmangtu mipui zat en hian Aizawl khawpuiin hnianghnar taka a ei tur pek chhuah hi thil harsa tak a ni ang.

Sorkar pawhin theihtawp a chhuahin hnathawkte pawhin theihtawp an chhuah ṭhin chungin ṭhalah chuan tui hi kan indaih tak tak dawnin a lang lo a, chhung tinin ruah tui khawl kan zir thar leh a ṭha khawp mai. Ruah tui tlak tamna rama cheng kan ni a, tui khawlna ṭha tak kan buatsaih thei a nih chuan mahni chhung tla tur khawp tur tui khawl hi thil harsa tak a nih hmel lo a, hemi kawnga kan inzir thar a hun khawp mai.

Hei bakah hian sorkar pawhin tui connection pek chhuah dan hi a ennawn thar a ṭha a, pawisa nei deuhin tui connection tam tak an nei pawh hi tihtawp ni thei se tui hi a insemzai thei deuh ngei ang. Mizoram sorkar tán a mipuite tana tui hnianghnar zawk sem chhuah hi a tihtur a ni a, theihtawp chhuahin ṭan han la zel teh se.