Aizawl luhkâ

Disaster Management & Rehabilitation (DMR) minister chuan, Ngaizel kawng chung khâma lung tla ṭhin ven nan DMR department-in ṭha leh mumal zawka hmalak a tum mek thu Assembly House a hrilh a; Hunthar Venga lei tlahniam ṭhin chu sorkarin tihdam tuma ṭan a lak thu a sawi. 

Aizawl khawpuia mipui cheng hi an ṭhahnem ta hle mai a, lirthei lut leh chhuak pawh a pung hle. Aizawl khawpui luhna kawngpui hrang hrang hi a him ṭha tawk lo hle mai a, sorkarin hemi kawngah hian ṭan lak a tum niin a lang a, a lawmawm hle. 

Hunthar venga lei tlahniam leh lei min reng mai hian Aizawl khawpui nun a tibuai ṭhin hle a, traffic jam inzawm thui lutuk avangin khawpui chhung a buai phak chang a awm a, airport pan tur mi tam tak an buai phah a, bungraw lut tur tangkhang nen nun phung a tibuai ṭhin hle. Sorkarin ṭan la thar a, kawngpui a siam ṭhat bakah tuam dam hlen tuma ruahmanna lian tham tak a siam hi thil lawmawm tak a ni. 

Ngaizel phei hi a khat tawkin lung lian tham a tla fo a, vanduai ṭum ni se mi tam tak thihna thlen thei a ni. Helai pheiah hian mi ṭhahnem tak eizawngin nileng lengin an awm a, chenna in a awm bawk a, khualzin veivah tamna lam a ni bawk nen lung tla fo leh leimin fo hi invenna ngaihtuah chu a ṭul khawp mai. 

Chutiang bawkin Aizawl luhna kawng­pui dang Dur­tlang lamte pawh hi ngaihthah chi a ni lo. A chhak tlang aṭanga lung leh lei tla avanga harsatna thleng fo a ni a, inven theih hunlaia inven hi a finthlak hle ang. Zemabawk lamte pawh a khat tawkin leimin hlauhawm tak tak, lirthei kal tlang hleihtheih loh changte a awm ṭhin kha a ni a, kum hnih khat a min loh avanga ngaih tiṭha mai loin a dam hlen theih dan ngaihtuah ngei a ṭha. 

Sorkarin Aizawl luhkâ hrang hrangte a ngai pawimawh hi a lawmawm a, tun ṭuma House-a sawi lan loh hmun dangte pawh hi enfiahin ṭan la zel se a lawmawm hle ang.