Tlawmngai pawl

Aizawl District Court chuan MHIP General headquarters chu a titawp (suspend) lailawk a, MHIP office bearers-te pawh MHIP hminga che zui lo tur leh an seal-te pawh thehlut turin a hriattir. 

MHIP buai chhan ber hi chu hruaitu thar an inthlan tur thu kal zel a ni a, hei hi tlawmngai pawl hrang hrang inthlang turin a ken tel a ni ta emaw tih mai tur a ni. Tlawmngai pawl hruaitu hi tun hma deuh kha chuan, "Nang ni rawh," tiin an inkian ṭhin a, tunah chuan a chuhin an inchuh a, lam ṭang an zawng a, pawl lian deuhah chuan political party-te hial pawh an remchan danin an inrawlh ta a, a pawi hle a ni. 

MHIP-te hi a vanduai leh a mualphoah an ṭang ta a ni mai a, hei hi Mizorama tlawmngai pawl dangte pawhin an tawn ve theih tur thil a ni. Zêp thu a cheng lo a, kan tlawmngai pawlte inthlan dan hi a lo danglam zo ta a, nihna inchuh reng rengin an tâl ta fo mai. Inthlana vote nei thei chinte pawhin politics-a inthlang ang maiin an buaipui a, hruaitu nih tumte hnena phût neia mahni vote hralh ang leka khawsa duh an awm zel bawk a, a vanduaithlak takzet a ni. 

Mizoram kalphung leh Mizo khawtlang nun inrelbawlna atan tlawmngai pawlte hi an pawimawh em em a, hei hi sorkar pawhin hriain tlawmngai pawl lian deuh china hruaitute hi chu a dah pawimawh ṭhin a, hamṭhatna tam tak an neih phah niin a lang. Heng sorkar duhsaknate leh khawtlanga mi challang nih duhna hian kan tlawmngai pawl ṭhenkhat hruai­tute hi a bual â mek niin a lang a, political party lamin an tana hamṭhatna awm thei zawngin 'ṭan lam' an lo nei ve thuai bawk a, hei hi kan tihtawp ngam a hun ta takzet a ni.

MHIP an mualpho a, hei hi tlawmngai pawl dangte pawhin an tawn ve theih a nih avangin kan tlawmngai pawl inrelbawl dan, a bikin hruaitu thlan dan kalphung hi chu kan ennawn ngam a hun ta hle.