Sorkar ram mimal kutah

Lunglei Venglaia mi pakhatin an venga sorkar primary school ram, a in hmun atana Chief Minister hnena a dil chu CM chuan tihfelsak turin Land Revenue & Settlement department hotute ziakin a hriattir a; chutih laiin, Lunglei Venglai V/C chuan Venglai P/S ram mimal kuta pek an rem tih loh avangin a tawp thlenga dodal an tum thu an puang. 

Lunglei Venglaia thil thleng hian social media-ah khel a hlawh zui hle mai a, mi pakhatin sorkar ram chu a mimal tan chief minister-ah a dil a ni. A diltu hian ram a neih loh avangin sorkar hmun remchang ṭha lai chu a mimal ram atan chief minister-ah a dil a, kan state hotupa ber hian a lo phalsak chu a ni ber a, bawhzui turin lehkha a ziak a ni. 

Chief minister berin a ziah tawh chuan sorkar official tan dan ngam a harsa tawh a, sorkar ram duhlai tak pawh ni se a diltu an awm a, sorkar hotu lu ber chief minister-in pek tura a ziah tawh bawk si chuan chief minister phalna angin mimal kutah a lut dawn niawm tak a ni. 

Mizoramah hian mahni puala ram nei lo mi tam tak an awm a, a bikin khawpuiah an tam lehzual ang. Heng mite hian an ram neih loh chhuanlamin sorkar ram remchang deuhte chief minister-ah hian dil ta ṭheuh se, kan hotupa hian a remtihna lehkha lo ziak ve ta zel mai se, buaina lian tak kan hmachhawn mai dawn a ni. 

He thil thleng hian Mizoram mipuite min kai harh se la, kan ram hotute pawhin ram pum hotu an nih inhriain tute emaw tana sorkar ram pek hi a ṭha ber lo tih an zir chhuah a hun ta khawp mai. Sorkar ram a ni a, vantlang tana ṭha zawk tura hleh thlak ṭhen pawh ni lo, mimal tana pek phalna kan state hotupa CM meuhin a lo ziak duh mai hian ngaihtuah a tithui khawp mai.