Ei atana him

Health Services joint direc­tor (Food & Drugs) chuan thuchhuah siamin, Mizoramah Ajinomoto ṭha lo leh him lo a awm thu a tarlang a, fimkhur turin mipui a chah. 

He thuchhuaha a lan dan chuan Ajinomoto tih hming pu, ei atana zawrh leh hralh chhuah chi hnih a awm a, ram páwn aṭanga lak luh ve ve a ni tih tarlangin, "Pakhat chu ram páwn aṭanga FSSAI phalna thlapa Ajinomoto India Private Limited, Chennai-in a lâk luh a ni a, hei hi ei atana him tura ngaih a ni. Pakhat dang leh chu phalna awm loa lak luh leh zawrh a ni a, a label pawh Food Safety & Standard Act 2006 leh Rules & Regulation kalha siam a ni," tih a ni. 

Mizote hi ei leh in chungchang­ah hian kan fimkhur tawk lo a, a nawlpuiin kan ei tur leh kan in tur thianghlimna lam hi kan ngaihtuah tawk lo niin a lang. Tun hnaiah hian mi ṭhenkhatin ei leh in thianghlim leh hrisel lam an han uar ṭan a, zawi zawiin chu lamah chuan kan ṭhangharh mek a, hmasawnna lawmawm tak a ni. 

Mizoramah hian ei tur hi hmun hrang hrang aṭangin kan lalut a, kan thil lakluh ṭhenkhat hi chu khaw chhak lam aṭanga lo lut a ni. Hengte hi dan ang taka lakluh a ni lo a, eng ang chiaha hima him lo nge a nih tih pawh kan hre meuh lo. Sorkar lamin an tih tur tia hetia an lo endik hi a lawmawm a, ei leh in tur dangte pawh hi endikin finfiah vek thei se a ṭha khawp mai. 

Ei tur siam sa kan lakluhte chu sawi loh kan sa eite ngei pawh hi eng ang taka thinghlim nge a nih kan hre meuh lo a, a lo luhna lamte hi ngun taka chhui chian a ṭha a, sorkar lama department hrang hrangte ṭang kawpin kan sa ei 

ṭhinte lo luhna leh a hriselna hi endik tel thei se a lawmawm khawp ang.