Mizoram Youth Commission

Labour, Employment, Skill Development & Entre­preneurship (LESDE) minister chuan kum 2020-21 chhungin Mizoram Youth Commission (MYC) kal tlanga hna hmu an awm loh thu Assembly House-ah zawhna chhangin a sawi a; Covid-19 avanga state pawn aṭanga rawn haw Mizo ṭhalaite khai chhuahna tur programme hrang hrang kalpui mek a nih thu a sawi bawk. 

MYC hi din a nih tirh aṭanga tun thlenga a hna­thawh tawhte thlirin state tan a ṭangkai hle tih hai rual a ni lo a, chutih rualin a hnathawh sawi fak tur awm loin an fawm zau lutuk palh ang tih hlauhawm tak a ni. A hmingin a huam tel miau avangin ṭhalaite kaihhnawih thil zawng zawng a huam thei a, chutih rualin ṭhalai pual ang deuh Sports & Youth Services department a awm tawh sa a, hna zawngtute tan  LESDE a awm bawk nen, MYC dinhmun hi a laklawh ti zawnga sawi theih a ni awm e.

Congress-in sorkarna vawn fung an chelh chhungte leh tuna MNF kaihhruai sorkar hnuaiah hian MYC-ah sum ṭhahnem tham tak hman a ni tawh a, heng sumte hi a luang ral mai mai lo a, ṭhalaite tana hman a ni ngei chungin MYC a din hnua ṭhalaite hmasawnna sawi tur hi a tam lo mai thei. Hei hi MYC-a thawktute leh a enkawltu lam thiam loh ni loin, sorkarin MYC a enkawl dan leh MYC tan sum a dah zat thlir hian MYC hi hnathawk tak tak theia siam a tum lo a ang hle. 

Engpawhnise MYC hi a hranpaa kan neih tawh avangin sorkar hian ṭangkai zawka hman dan ngaihtuah se, ṭhalaite tana innghahna tlak MYC din turin sorkar hian ṭan han la zel teh se.