ZIDCO

ZIDCO chairman thar chuan ZIDCO-in loan pek chhuah leh an tum thu tun hnai khan a puang a, MNF sorkarah mipui beisei angin ZIDCO chu siamthar leh an tum thu sawiin, "Project hrang hrang siamin bul kan ṭan chho mek a, kan hlawhtlin thuai ka ring. ZIDCO hian loan chi hrang hrangte hi pek leh theih kan tum a ni," tiin a sawi. 

Tun hma deuh khan ZIDCO chak tak leh thawm na tak kan nei ṭhin a, loan-te pe chhuakin project hrang hrang an kalpui. Hlawhtlinna hmu mi ṭhahnem tak an awm rualin an pawisa pukte tiriral a, rul ṭha mang lo tam tak an awm bawk; anmahni an intih chhiat bakah ZIDCO ngei pawh leiba tam tak neiin an chhuah a, a pawi hle a ni. 

Harsatna hrang hrang avangin PSU ṭhenkhat sorkarin a khar a, an khar loh zingah ZIDCO hi tel mah se tun hma angin a thawm hriat tur a awm ta meuh lo. Tunah ZIDCO lian leh chak zawka kalpui tumna a awm leh ta hi thil lawmawm a nih rualin tun hmaa an tihsual tawh aṭanga an inzir a pawimawh hle ang. 

Mizo zingah loan awmze hre mang lo emaw tih tur khawpa a lâk lam ringawt phur, a rulh leh lama che ṭha duh lo kan tam hi a vanduaithlak a, hei hi ZIDCO pawhin a tlakchhiat pui viau a nih kha. Tunah chuan thil kal dan fuh tawh lo aṭanga inzir chungin ZIDCO hmel thar hmuh i beisei ang u. 

ZIDCO tihchak leh tumna hi Mizote industry lama ke pen and tura min tichaktu lo ni zel se, political party mi leh sate induhsakna hmanrua mai mai ni lo, ram tana rotling dinna ni ngei se a ṭha ang. ZIDCO tihchangtlun thar leha loan pe chhuak thei tura kalpui tumna awm hi thil lawmawm tak a ni a, hemi tura ruahmanna awmte hi chak taka kalpui theih ni se a ṭha khawp mai.