Aia upa zah

Tun hnai khan Chanmari kâwn traffic point bulah mi kut an thlâk rawn a, kut an thlak zinga pakhat, Chanmari Presbyterian kohhran upa chu damdawi-inah hruai a ni. He thil thlengah hian Aizawl Police Station-ah FIR thehluh a ni a, kutthlaktu mi palite chu police-te'n an man tawh a ni. 

Tun hnaia sawi hlawh tak pakhat chu tleirawl/ rawlthar rualin mahni aia upa zahna an tlachham ta nia lang hi a ni. Aia upa zah chu sawi loh, mahni aia upa kutthlak hreh lohna hial a lo piang ta a, tun hnai deuhah hmun hrang hrangah aia upa chunga kutthlak thawm hriat tur a tam ta hle. 

Aia upa zahna tlahniam zel mai nia lang tibo tur hian zirna sikulah theihtawp chhuaha thar thawh chi a ni a, sunday sikul angahte hian tun aia uara inzirtir a ngai a ni. Chhungkaw tam takin mahni fate zirtir ṭha thawkhat mah se, mahni fate pawh zirtirna ṭha pe miah lo chhungkaw tam tak an awm ta, fate zilh thei dinhmuna ding bik lo nu leh pate pawh an awm hial a ni. 

Tun hnaia thil thleng sawi hlawh ta hat hi aia upa zahna tlahniam ta a lan chhuahna thil pakhat mai a ni a, hetiang deuh hi hmun tam takah a thleng ta fo mai. Mizo ṭhalaiin mahni aia upa an zah tawh loh a, naupangin puitling thu a ngaithla duh tawh lo a nih chuan, a hnam puma ṭan kan lâk a ngai hle tih a chiang. 

Kan tleirawl leh rawltharte hi an sualin an fel lo ta vek a ni hauh lo a, zirtirna ṭha leh inkaihhruaina khauh zawk nen chuan kawng kawhhmuh theih an ni ngei ang a, tun hnaia thil thleng hrang hrangte hi aia upa zahna kawnga min 

ṭhanharhtirtuah i hmang hlauh ang u.