Zirtirtu sem rual ngam sorkar
Mizoram sorkar hnuaia district parukah primary school 812 a awm a, zirtirtu 2,717 an awm. Zirtirtu pakhat chauh awmna sikul 53 a awm a, zirtirtu pahnih chauh awmna sikul 184 a awm bawk. Hetih lai hian, Aizawl khawpui chhungah zirlai 30 vel leh a aia tlem hret awmnaah zirtirtu 4-6 awmna P/S eng emaw zat a awm thung.
RTI Act hmanga zawhna sorkar lamin an chhan dan aṭanga thil lang chiang tak chu Mizoram sorkar sikulah hian zirtirtu an indaih lo a ni chiah lo a, zirtirtu an sem rual ngam loh avangin harsatna an tawk a ang ber. Khawpui leh hmun laili deuha sikulah zirtirtu an tam viau laiin khaw kilkhawr deuhah zirtirtu pakhat chiah awmna sikulte a awm a ni.
Aizawl khawpuia sorkar P/S zingah zirlai 40 pawh awm tlin lohnaah zirtirtu paruk awmna a awm nual a, hetiang hian khaw lian deuh dangah pawh zirtirtu ṭhahnem tak awmna zirlai nei tlem si an awm. Thil chiang taka lang ta chu tuna zirtirtu kan neih sate pawh hi Mizoram sorkar hian huaisen takin mamawhna hmunah sem darh ngam ta ngat se, zirtirtu indaihlohna tia kan aupui tam tak hi chu chinfel nghal theih a nih hmel.
Mizorama sorkar kan hrawn tawhte hian sorkar sikul zirtirtu hi mamawhna hmunah an dah thei lo a ni ber mai. Zirtirtu tam tak hi chu an awmna khuaa kohhran leh khawtlang hruaitute an ni a, an hnathawhna sikulin zirtirtu mamawh tawh lo mah se sorkarin khawtlang leh kohhran zahna vangtein a sawn chhuak ngam meuh lo ṭhin. Tin, milian leh thiltithei hmelhriat nei zingah khawpuia awm nghet tlat zirtirtu an awm a, sawn thiang lo ang mai an ni.
Mizoramin a mamawh chu zirtirtu lak belh aiin a sem rual ngam sorkar a ni a, he sorkar hian a hnuaia hnathawk zirtirtute hi zirlai leh a khawtlangin an mamawhna hmunah a sem rual ngam nge ngam lo i lo thlir ang u.