Mizo chauh dah tumna

Higher & Technical Education (HTE) director atana hnam dang officer dah a nih duhlohna lantirin Mizo Students' Union chuan director chu sawn chhuak turin sorkar an ngen a. Director pisa tualah pungkhawmin sorkar an kar a, Mizoram sorkar chuan director-a a dah hnam dang officer hi hmun dang­ah a sawn dawn ta. 

Zirlai pawl lam chuan he officer hi mimala an hnawl loh thu leh, officer ṭha tak a nih ngei an rin thu an sawi rualin, HTE hnuaiah technical leh medical lam bakah entrance exam hrang hrang buatsaih a ni ṭhin a, tun hmaa harsatna lo thleng tawhte avangin Mizo officer ngei awm se an duh thu an sawi. 

Zirlaite thlirna lam aṭanga chuan HTE director-a hnam dang ni loa Mizo ngei dah hi thil âwm tak a ni a, chutih rualin hnam dang hrim hrim duhlohna leh hnawlna thinlung hi kan ṭhangtharte hian an pu ang tih a hlauhawm hle. Khawvel kalphung dan en hian tute mah ni mahni hnam bila inkhung hranga inhung bing thei an awm tawh lo a, hnam hrang hrang hi kan inkal pawhin kawng hrang hrangah kan inzawm tawh a; India sorkar hnuaia kan awm hnu phei hi chuan hnam dang officer-te hi Mizorama thawk thei an ni a, an thawk mek reng zawk a ni. 

Hei vang hian hnam dangte thawh ve theih loh hna bik awm anga ngaihte hi a ṭha ber lo a, tun hmaa HTE-a thil kal fuh lo awmte chu a theih chin china venpui ni ta zawk se; hna a thawh hma hauh aṭanga hnam dang a nih avanga officer-te kan dang zel dawn a nih chuan thil finthlak ber a ni awm lo e. 

Mi ṭha leh thiam na na na chu eng hnam pawh ni se a awmna hnamte tan mi hnawksak ni loin mi ṭangkai a ni dawn. Kan hnampui ngei pawh officer pawimawh kan neihte zingah mi dik lo leh pamham an tel ve fo avangin kan ram pawhin hma a sawn lo tiin kan phun kan phun mek zawk a ni. Engpawhnise 'Mizo chauh thawh theih' anga sorkar department ṭhenkhata post pawimawh hi kan hauh zel a rem ber lo a, 'mi dikte chauh thawh theih' ti zawnga her rem theih ni zawk se ramin a ṭhatpui zawk ngei ang.