District ramri

Lunglei district-a awm mek Kânghmun South khawtlang chuan resolution siamin, Serchhip district-a beh an duh thu an puang a, "Kanghmun South hi kawng hrang hranga thlirin, Serchhip district-ah awm ngei kan duh a, Serchhip district-ah kan awm theih nan a ṭul anga a tàwp thlenga hmalak kan tum a ni," an ti. 

Mizoram sorkarin a lo intiam tawh angin district pathum - Khawzawl, Saitual, Hnahthial - chu hna­thawk theia siam a tum mek a, office hmun turte an thlithlai tawh bakah district-a mi pawimawhte dahna tur pawh thuchhuah a siam ṭan mek. Hetihlai hian Assembly budget session neih mekah Chief Minister chuan district ramri rin fel a la nih loh thu a sawi ve thung. 

District thar hi a district ṭhut­hmun (headquarters) tur khua leh a chhehvela awm hnaite hi chuan an duhin a nawrin an nawr a; nimahsela district thar hnuaia awm hi he district tharin a huam tur nia ngaih khaw tam takin an duh lo ve thei bawk. District thar na na na chuan kawng tam takah famkim lohna a nei dawn a, district-in a ken tel thil ṭhenkhatah mipuiten harsatna an tawk ve thei. 

Mipui nuai 11 vel enkawl turin district 11 kan nei dawn ta a, chawhrualin district pakhatah mipui nuai khat vel cheng ang zel kan ni ang. Hetihlai hian district lian fâl leh mipui bitna a awm lo thei lo a, district hming pu ve si, mipui tlemte awmna a piang thei dawn niin a lang. 

Tunah huan district neih belh a ṭhat leh ṭhat loha inhnial a ngai tawh lo a, heng district ramri hi ṭhen fel a hun tawh zawk a ni. Inthlan hmain district thar puitlintir tiamtuin ro an rel tawh a, pehhel rei loa huaisen taka district ramri an rin fel ngam a hun tawh. District thar ber a piang tawh angin kan sawi a, tun thlengin a ramri kan la hre bawk si lo a, district tihpuitlinna tura thil ṭul hmasa chu a ramri tihchian hi a ni ang.