Zirtirtu awmna siam rem leh siksawi

Assembly session neuh mekah School Education minister chuan, 'Mizoram Education (Transfer and Posting of School Teachers) (Amendment) Rules, 2020 a pharh. Rules-ah hian, zirtirtu an awmna hmun ngaia an awm tur chin bituk a ni. 

Mizorama zirnain hma a sawn theih loh chhan lian tak chu thingtlang kilkhawr zawka zirtirtu indaih­lohna lian lutuk hi a ni a, zirlai tán pawh hmasawn harsa khawpin khaw tam taka sorkar sikulah zirtirtu an indaih lo. Hetihlai hian khawpui leh hmun nuam deuh­ahte chuan mamawh aia tam zirtirtu an awm del dul a, sorkarin a siam rem hleithei si lo a, chu chu pawi sawi lo zirlaiten an tuar ta a ni ber. 

Zirtirtu tam berte'n khawpuia luh duhin an thiam ang angin thuneitu an dawr a; damlohna leh harsatna bîk avanga khawpuia transfer pawh ni lo, sawipuitu leh hmelhriat neih ṭhat avanga khawpuia lut a, an pension thleng ṭhak ṭhaka khawpuia hun hmang zo zirtirtu hi an tam hle. 

Hei hi siam ṭhat tumin sorkar kan neih tawhten ṭan an la ṭheuh a, nimahsela an siam ṭha thei lo a ni ber mai. MNF kaihhruai sorkar thar a lo piang a, kum khat emaw chhung lekin zirtirtu 100 chuang zet chu Aizawl khawpuiah an sawn lut leh der tawh a ni! 

Tunah chuan zirtirtu transfer leh posting-a buaina chinfel tumin Transfer and Posting rules siam a lo ni ta a, hei hi thil lawmawm tak a ni a; dana inziak anga rang takin zirtirtu indaih lo leh indaih leh lutuk avanga buaina hi chinfel ni thuai rawh se.