Mizoram chhana au

Mizoram MP (Rajya Sabha) chuan June 25 khan Parliament session-ah thu a sawi a; Mizoram mipui Citizens Amendment Bill (CAB) an duh loh thu leh tharthawh leh pawh an duh loh thu a au chhuahpui; CAB chu a puitlin chuan Bangladesh-a Chakma foreigner-te Mizorama hruai luttu tur a nih thu a sawi. 

Mizoramin India ram rorelna in sang Parliament House-a in hnihah aiawh pakhat ve ve chiah kan nei. Kan ram awmna a thlaler deuh vang te, kan state chhana au chhuahna remchang a awm vak loh avang te, kan MP-te'n an zir tawk loh vangte leh chhan hrang hrang vangin Mizo MP-te hian Parliament House-ah hnuhma an nei lian vak lo a, an thusawi hi sawi chhawn tur a tam lo hle. 

Tun hnaiah Mizoram mai ni lo India hmar chhak state-te'n kan duh loh em em CAB chungchang chu Parliament House-ah sawi chhuah a ni leh ta a, Mizoram Rajya Sabha MP-in a dodal zawnga huaisen taka aw a chhuah ngam hi a fakawm hle. He thil hi political party zawnga lak chi a ni lo a, tihpuitlin a nih chuan Mizoram leh Mizo hnam tana him lo thei tur a ni a, a do hunlaia do hi kan tih tur a ni. 

Keini do avang emaw, kan MP-te'n an au chhuahpui avangin emaw CAB kal tlangpui tumna hi an ṭhulh kher lo mai thei; nimahsela kan theihna zawna au chhuahpui hi kan tih tur a ni. Kan state aiawha Parlianment in hniha member kan neihte hi remchang an hmuh apiangin Mizoram chhan turin au chhuak ṭhin se, Rajya Sabha MP-in CAB chungchanga Mizoram leh Mizote tana ṭan a la hi a lawmawm khawp mai.