Bru lak let hna

Tripura refugee camp-a awm mek Mizoram Bru-te kumin chhunga Mizorama hruai kîr tura hmalakna buaipui bik turin, Mizoram sorkar chuan MCS officer pasarih a ruat thar. Bru lâk lêt tumnaah hian Mizoram sorkar chu a inbuatsaih mek zel a ni. 

Mizoram aṭanga anmahni duh thu ngeia tlan chhuak Bru-te hi vawi tam Mizoram leh Mizo mipuite min tibuaitu leh min timualphotu an ni tawh a, Mizorama an lo kir dan tur ngaihtuah nawn ngai reng mai hi chu Mizo mipui tan chuan thil ninawm tak a ni tawh. Kan NGO lamte'n dan hnuaiah sorkar laipui dawrin Bru-te an kir theihna turin theihtawp an chhuah a, a hla hlawhtling hleithei lo. 

Bru-te lo kir loh chhan hi an thil phût ang pek kim theih an nih dawn loh vang ni bawk mah se, a chhanah hian politics a inrawlh thui hle. State assembly inthlan dawn apiangin thu thar an nei a, Lok Sabha inthlan dawnah a hlawmin âwn lam an nei ziah bawk a ni. Kum 2014 Lok Sabha inthlan dawn phei chuan tlawmngai pawlte'n political party-te hnenah tute mah Bru ho inkulhna Tripura lama campaign lo turin an ngen hial a nih kha. 

Tunah hi chuan Mizoram pawnah awmin Mizoramah vote an nei tho a, inthlan dawn apiangin vote duh leh mamawh political party-te'n an tlawn zel a, anni lamin an hlawkpui tur zawng zelin thil an lo kalpui a, tun hi kan thleng ta a ni. Mizoram sorkar hian Bru lak let hi tihtakzeta kalpui a tum a nih hmel a, ṭum dang ang bawkin, 'tuna an lo kir loh chuan auh an ni tawh lo ang,' tia lo kir lo bawka a zuzi tawh lohna turin ṭan han la tak tak se, tun ṭum hi Bru koh kir tumnaa a tawpna ni tawh bawk rawh se.