Kuthnathawktute leh Mizoram budget

Kum 2021-22 atana Mizoram budget (estimate) Demand for Grants 2021-2022-a tarlan cheng nuai 11,33,088.78-ah kuthnathawktute kaihhnawih department pangaa sum dah zat belhkhawm chu cheng nuai 3,83,36.29 a ni a, hei hi a pumpui aṭangin 3.38% a ni. 

Kuthnathawktute kaih-hnawih (Agriculture and allied) depart­ment panga hi Agriculture, Horti­culture, Animal Hus­bandry and Veterinary, Sericul­ture leh Fisheries department-te an ni a, hengahte hian pawisa dah a tlem mai ni loin an department pangaa sorkar pawisa dah zat belhkhawm aia sum dah tamna department mal 10 zet a awm.

Mizoram mipui zinga a tam ber hi kuthnathawka eizawng an ni a, heng mite hi a tehna chiang tak awm lo mah se 70% vel nia sawi ṭhin a ni. Mizorama kuthnathawka eizawngtu chu eng zat pawh lo ni ta se, chumite tana budget-a pawisa dah zat en hian, kan sorkar budget pharh tak hi mirethei lam ṭang budget niin a lang lo a, a pawi hle. 

Kan ram dinhmun kan hria a, state pachhe ber zinga mi kan ni a, chumi chhunga kuthna­thawktute dinhmun chhiatzia chu inhriat nawn kan ngai lo. Sorkara hna hniam lam group D hlawh zat ang hu thar chhuah tur hi kuthnathawktu tam zawkte tan chuan thil theih loh a ni a, an nghei lohna turin an thawk ve ṭawk ṭawk chauh a ni. 

Heti khawpa din­hmun chhe tawh kan rama kuthna­thawktute puala sorkarin pawisa dah a nei mumal lo hi thil mak tak a ni a; SEDP-a pawisa dah an lo hman tawh dan en lahin heng kaihhnawih department lamah hian hman a tlem em em bawk si a, sorkar hian kuthnathawktute hi a hre ta lo nge, anmahni khaichhuahna tur pawisa dah tur a nei lo zawk, tih hi zawhna awm thei tak a ni.