Aizawla tui harsat chhan
PHE department changtu minister Tawnluia chuan, tunlaia Aizawl khawpui tui harsat chhan pakhat chu Luangmualah P&E department-in transformer an bun lai, Phase I leh II tui pump khawl tihkalna a chhiat vang niin a sawi a, hei hi PHE department pawhin February 23, 2021 khan hriain theihtawp chhuahin a tel loa tui pump dan kawng dapin hna an thawk mawlh mawlh tih a sawi.
Aizawl khawpuiah tunlai hian tui a harsa em em a, veng tam takah PHE tui connection-ah tui an pek loh avangin mipuiin tui lei tur an zawng nasa hle. Private-a tui zuarte an rak hle a, tui lei turin kar hnih chhung te nghah a ngai a ni.
Hei mai hi ni loin ruah a tlak loh rei tawh avangin khúa a ṭhal a, motor-a tui chawi ṭhin ṭhenkhat chu an tui chawina lui leh tui hnarte a kang chat tawh a, hmun hla zawkah tui an chawi a ngai tawh. Hei hi remchanga lain tui zuarte pawhin tui man an tisang chho zel a, tui an lakna hmun a hlat vang te, midang tui lei chhawngtute tui leina rate a san tawh avangte leh diesel/petrol man pung zel avangin tui man an tisang niin an sawi. Tun hnai thlà hnih/ khat chhungin tui man a pung chho mêk bawk.
Tui hi a tel loa kan awm theih loh a ni a, kan sorkar hotu lam chuan tui harsat chhan an sawi tawh a, harsatna sut kian dan pawh an zawng mêk ang. Thil mak tak mai chu PHE lamin hnianghnar taka tui an sem theih loh chhana mawhphurtu chu department dang P&E lam an ni teh daih hi a ni. Heng department pahnih hi chak zawk leh ṭha zawkin thawk dun se, Aizawl mipuite tui a hal mêk a ni ber e.
Aizawlah mihring an pung zel a, hei vang hian Aizawl chawmtu tur tui laknaa a tira a chawm theih zat tura an bituk aia tam daih an chawm tawh a, khawlin a tlin loh chang a awm ang a, thawktu lamin an tlin loh chang pawh a awm thei ang.
Tuna pawimawh ber erawh chu tui neih loh chhan hriat lam aiin tui pek dan tur hriat a ni ta. Aizawla tui harsatnain ziaawm lam a pan thuai theihna turin sorkarin thapui chhuah se, a tawpa a tuartu chu miretheite bawk an nih ṭhin avangin miretheite tán kan sorkar hi han ṭang tak tak teh se.