Thu rel leh puanzar thu

March 9, 2021-a Health minister, Home minister, Medical Operational Team chairman, NGO hrang hrang hruaitu, Mizoram Kohhran Hruaitute Committee, Indian Medical Association leh Mizo Zirlai pawl aiawhte awmna inhmu khawm chuan Mizorama Covid-19 dinhmun an thlir a, "Uluk taka an sawiho hnuah boruakin ziaawm lam a pan zel nia a lan avangin kar khatah zan hnih Pathian niah inkhawm neih tawh ni se an ti. Biak-ina Pathian faka zaiho pawh phal tawh ni se an ti," tiin sorkar thuchhuah chuan a tarlang. 

He mi tuk, March 10-ah State Executive Committee, Mizoram State Disaster Ma­nagement chuan Covid-19 chung changa inkaihhruai­na (SOP) thar ber a tichhuak a, biak-ina inkhawmah zaiho leh hla sak phal a nih loh thu tarlan a ni a; sorkar thuchhuah thar berah chuan puipunna hmuna mal zai (solo) pawh phal a nih tawh loh thu tarlan a ni. 

Sorkar thuneitu lamin pun­khawmnaa zai an phal loh chhan hi eng dang vang ni loin Covid-19 hri leng a darh zel lohna tura inkaihhruaina an siam a ni. Hei hi tute emaw ṭhatna tur bik leh tute emaw chhiatna tur lam hawi niin a lang lo a, Mizoram pum tana ṭha ber tura an ngaih a ni. Sorkarin ruahmanna a siam thiam leh thiam lohah mipui himna hi thui tak a innghat a, hei vang hian mithiamte ngaihdan an lak hnuah a mipui sahimna tur nia hriain sorkar chuan biak-ina zai loh hi a rawt leh ta zawk niin a lang. 

Hei hi politics-a inchirh theh zuaina tur chi niin a lang lem lo. Sorkar hian mipui tana ṭha tur ngaihtuahna aṭangin he rawtna hi a siam thar leh ta tih a lang a; nimahsela thutlukna siam hmanhmawh lutuk emaw, thutlukna puanzar hmanhmawh lutuk emaw hi chu sim a ṭha khawp mai. Covid-19 hri leng pawhin ziaawm lam a pan ṭan a, hmanhmawh vut vuta thutlukna siam a ngai tawh lem lo bawk a, a tuk lawka thlak leh tura rorel hi a fel lo a; rel loh dana puanzar a lo awm a nih phei chuan a fel lo lehzual ang. 

March 9-a inhmu­khawmte hian thurel chu an nei ngei tih a lang a, Mizorama mi pawimawh ṭhiau ṭhukhawmte thurel a tuk lawka ṭhiaha a awm nia langah hian inbiak pawh tawnna fel lo (communication gap) a awm palh a ni thei a; kan sorkar hruai­tu pawimawh ber berte awmna mai ni lo, doctor thiam rual awmna Indian Medical Association aiawhte pawh an telnain rawtna a siam hnu lawka an sût leh ta nia langte thleng hian thil kal dan rem zan lo deuh chu a awm tih phat rual a ni lo.

Engpawhnise duh thuhmun nei kan ni a, Covid-19 hri leng laka him kan duh tlan avangin roreltute thu kan awih zel a ṭha ber. Roreltu lam pawhin fimkhur leh taima taka ro an rel chhunzawm zel a ṭha hle ang.